WILLEMSTAD. – Kòrsou atrobe ta den e temporada ku kantidat grandi di Sargassum ta drif yega nos kosta. For di dos siman pasá Ministerio di GMN a risibí notifikashon kaba ku tin kantidat grandi di Sargassum den laman ta biniendo den nos direkshon. Maneho di Medio Ambiente i Naturalesa ya a inisiá inventarisashon di e daño na e áreanan mas afektá kual ta Sint Joris i Ascencion. E departamento lo sigui monitoria e situashon e dianan aki pa despues di inventarisashon plania un momento ku ta mas efikas i efisiente pa atendé ku e Sargassum.

Sargassum ta un tipo di alga di Mar Atlántiko ku semper ta drif liber riba laman. Ounke hende ta eksperensiá molèster momentu ku e Sargassum ta riba tera, e tin un funshon importante den ekosistema marino. E ta forma refugio pa hopi sorto migratorio i ta habitat pa mas ku 120 sorto di piská i hopi sorto di espesie. Pa sierto espesie den peliger di ekstenshon manera turtuga tambe Sargassum ta forma habitat, refugio i kuminda. Meskos ta konta pa sierto tipo di piská komersialmente importante manera Tuna. Komo alga marino Sargassum ta faktor importante tambe den produkshon di oksígeno.

Apesar di e funshon fundamental di Sargassum den ekologia mundial, unabes riba tera i den kantidat grandi e ta forma molèster pa hende den forma di holó stinki. Alabes, momentu ku Sargassum drenta un di e bokanan e ta yena esaki di tal manera ku e ta forma peliger pa entre otro turtuganan. Nan ta keda pegá den e Sargassum bou di awa i no por bini ariba pa hala rosea. Riba potrètnan por mira e situashon aktual na Sint Joris i Ascencion. Ministerio di GMN mester hasi gastunan kuantioso pa limpia Sargassum den e áreanan afektá.

 

LAGA UN KOMENTARIO

Please enter your comment!
Please enter your name here