WILLEMSTAD – Aqualectra a informá ku ayera un pipa den área di Persueusweg a kibra. Konsekuensia ta ku Perseusweg, van Engelen, Mahaai, Hecubaweg, Hestiaweg, Heraweg i besindario tabata ta sin awa i algun asta pa kasi 12 ora. Pa por a yega kaminda ku e pipa a kibra, mester a hasi trabounan di kobamentu. Na e parti kaminda mester a koba, tabatin tin kabelnan tambe bou di tera ku ta pone ku Aqualectra mester a koba ku tur koutela nesesario pa e situashon no bira mas grave.
Na momentu ku a yega na e parti kaminda mester drecha e pipa di awa i pa hasi esaki mester a sera e liña prinsipal den e área temporalmente pa por kaba e trabounan. “Despensa ku e trabounan a dura muchu mas largu ku nos a spera.” E Impakto di mainta sin awa tabata grandi. E tim di Aqualectra a traha duru pa solushoná e problema.
Na momentu ku a logra konektá tur área bek ku awa, Aqualectra a informá tambe ku dor di e kantidat di ora ku kas òf negoshi a keda deskonektá, por sosodé ku e pipanan a yena ku airu òf un tiki sushi. “Pa por sigui ofresé bo e awa na un kalidat haltu, nos téknikonan a sòru pa spula e pipanan pa saka posibel sushi òf airu mas tantu posibel. Apesar di esaki, por sosodé ku e promé biaha ku a habri kranchi por haña molèster di un poko awa maron.”
Aqualectra a indiká tambe ku ta komprondé ku e situashon akí a kousa un dia no muchu agradabel. “Un biaha mas nos ke ofresé bo nos diskulpa di kurason i yama danki pa a karga ku nos miéntras nos tabata trahando riba e pipa di awa akí.” (Foto Aqualectra)
