WILLEMSTAD.– Kandidatanan ku lo kompetí pa Miss Curaçao 2020 na kuminsamentu di Aprel awor, direpente a haña instrukshon di e organisashon enkargá ku e elekshon, ku mester a pasa den un sorto di screening di prinsipalmente nan kurpa i tende ku nan ta gordo.
Mayoria di kandidata ku a asistí na e screening ku a tuma lugá wikènt último den un hotèl na Piscadera, mester a deskubrí ku tabatin dos (2) eksperto femenino deskonosí pa nan, ku tabata inspekshoná nan kurpa i duna konsehonan fuerte di korekshon.
Pa kolmo un dje ekspertonan a manda mensahe digital pa e kandidatanan, ku pa algu mas di 2000 florin, lo por a yuda e kandidatanan haña un kurpa pa por kompetí i ku tur esaki lo por a keda realisá tantu personalmente komo via di Zoom.
Segun e denunsia algun kandidata pa Miss Curaçao mester a tende den pitu ku nan tin demasiado peso, ku nan kueru tabata seku i/òf tabatin demasiado mancha i sigur un (1) kandidata mester a tende ku su kueru tabata demasiado gròf.
Pió ainda tambe algun aspirante pa e korona máksimo di Kòrsou, mester a soportá ku e ekspertonan a kuestioná nan partisipashon na un sertámen di beyesa i a puntra direktamente dikon nan a disidí na kompetí, siendo demasiado pisá.
Tres (3) kandidata ku a desaprobá e saminashon sin ku anteriormente tabatin ningun palabrashon ku e organisashon, awe a aserká redakshon di EXTRA pa ekspresá nan malkontentu pa e forma kon a trata nan algun dia pasá.
E screening organisá pa Curaçao Beauty Pageant Committee (CBPC) segun esnan ku a protestá, mester a tuma lugá for di kuminsamentu dje sertámen i no awor na final, pero tambe mester a tene kuenta ku dor di COVID-19 hopi kos a bai bruá.
Dor di COVID-19, lockdown i toque de queda hopi hende, inkluso e kandidatanan a kuminsá kome mas tantu i lógikamente subi di peso. Komo ku konstantemente mester a tende di CBPC ku no tin fecha ainda, e disiplina a sali for di man.
“Un kompetensia di Miss Playa ku mester a tuma lugá for di Sèptèmber aña pasá, a keda kanselá dor di e pandemia, pero organisashon no a bisa adelantá ki dia lo tene e parti di elekshon aki, te pa a bisa ki dia tin Miss Curaçao,” segun e denunsia.
“Awor pa kolmo a disidí na hinka Miss Playa den e elekshon final, loke no nesesariamente ta faboresé e parti kompetitivo di algun kandidata. E sistema ku a atendé ku e sertámen ta inaseptabel,” segun e grupo rabiá.
CBPC mester duna mas espasio pa e kandidatanan por bolbe pone nan kurpa na òrdu i duna sufisiente espasio pa por rekobrá un peso aseptabel pa e sertámen di beyesa, segun e grupo protestadó a finalisá bisando EXTRA.
