BOGOTA(AFP).- Por lo ménos 500.000 persona a protestá ayera den kayanan prinsipal di siudatnan di Colombia, den e manifestashon di mas grandi ku e gobièrnu di Gustavo Petro mester a enfrentá for di despues ku el a yega na poder komo binti luna pasá.

E grupo grandi di partisipante a inkluí organisashonnan médiko, tambe oposishon, forsanan polítiko i algun eks-aliado di iskierda. Nan ta rechasá su proyektonan relashoná ku servisio di salú, su inisiativa pa konvoká un asamblea Nashonal Konstituyente i e negosiashonnan di pas ku gruponan armá kendenan no a para ku nan violensia.

“Ami a vota pa un kambio, pa Petro, pero nos ta sigui  den e mesun kos. Mi ta marcha pasobra mi ta sigui kere ku Colombia tin algun speransa”, segun un señora di 64 aña ku penshun.

Na e kapital áwaseru no a para e manifestantenan di desena di míles ku a reuní riba Plaza Bolívar, bisiña dje sede presidensial.

Petro a yega na poder kasi dos aña pasá komo e promé minister iskierdista pa goberná e pais ku tradishonalmente ta keda dirigí pa élitenan konservador.

Ku 60% di desaprobashon, segun enkuesta dje kompania Invamar, e mandatario a bin ta pèrdè apoyo di forsanan polítiko den Kongreso i tambe den plasa públiko  kaminda e tabata hopi aktivo.

Den Cali, Medellin i Barranquilla e manifestantenan tabata karga bandera di Colombia, bistí ku kamisa blanku i e gritu: “Fuera Petro!”

Den e prinsipal siudatnan tabatin den kareda di mei mion manifestante, segun sifranan ofisial. Na Medellin so ya tabatin komo 350.000 persona riba kaya.

Petro, di su parti, a kalkulá e kantidat di manifestantenan na 250.000 , i a bisa riba X ku vários konsentrashon tabata “débil” i ku nan meta prinsipal tabata pa “tumba e gobièrnu di kambio ku un gòlpi bou di faha”.

LAGA UN KOMENTARIO

Please enter your comment!
Please enter your name here