EL PASO, TEXAS, MERKA, AP.- E alkaldenan di vários siudat merikano a  reuní djaweps den un sentro di detenshon di migrantenan na Texas, i a denunsiá ku apesar di e òrdu firmá pa presidente Donald Trump poniendo fin na separashonnan di famia, e krísis humanitario ku e mes a krea no a terminá.

E alkalde di Seattle Jenny Durkan a bisa ku e sentronan di refugio di inmigrantenan ta kompletamente yen debí na prosesonan penal inisiá pa e gobièrnu di Trump.

“E motibu dikon e muchanan no por wòrdu debolbé na nan mayornan ta debí ku e sistema ya a kambia debí na e regla di Trump”, segun Durkan. “No ta evidente si e menornan a wòrdu separá di nan famianan òf si nan ta wòrdu tratá komo menornan no kompañá. Outoridat no sa unda e mayornan di e muchanan aki ta. E kos aki ta un krísis humanitario”.

Durkan a uni mas o ménos 20 alkalde di Merka ku a pidi e reunifikashon inmediato di e famianan di e inmigrantenan.

E alkaldenan a papia un tras di otro den un konferensia di prensa dilanti tiendanan di e kampaña serka di Rio Bravo, kaminda tin kamponan agríkola. E òrdu ehekutivo di Trump a kousa mas pregunta ku kontesta.

E alkalde di New York Bill de Blasio a destaká ku ainda e muchanan no por wak nan mayornan, i no sa na ki momentu esaki por pasa tampoko.

E alkaldenan a pidi pa drenta den e instalashon pa wak e kondishonnan di konfirmamentu, pero Departamento di Salú i Asistensia Sosial no a permití esaki, asina e alkalde di Columbia, Steve Benjamin a bisa.

LAGA UN KOMENTARIO

Please enter your comment!
Please enter your name here