PARIS, AP.- Alkaldenan di London i Paris a kritiká e prohibishonnan franses di uso di burkini pa muhénan musulman. Esaki ta un trahe di baño ku ta kubri e kurpa kompletu. Alkaldenan a indiká ku tur muhé mester por lusi manera e kier ora e ta bishitá un playa.
E prohibishonnan di burkini den vários munisipalidat na kosta di Fransia e verano aki a generá un debate den e pais i tambe indignashon di mayoria persona den estranhero.
E alkalde di London Sadiq Khan, promé edil musulman di e siudat a bisa durante un bishita na Paris djaweps: “Mi ta komprondé ku tin un estado di emergensia na Fransia”, pero el a agregá ku “mi no ta kere ku niun hende mester bisa muhénan kiko pa bisti òf no”.Na mes momentu, alkaldesa di Paris Anne Hidalfo a pidi pa pone fin na e “histeria” tokante burkini i a bisa ku outoridatnan mester konsentrá riba un mehorashon di koheshon sosial. Partidarionan di prohibishonnan ta bisa ku burkini ta violá e balornan sekular di Fransia.
E protestanan ta tuma lugá un dia despues ku imágennan di medionan sosial a paresé mustrando polisnan uniformá pidiendo un muhé pa kita su burkini.
