ALM 980; Un buelo trankil ku a kaba den tragedia

Un dia manera awe, 2 di mei 1970 pa 11 minüt pa 4 di atardi, e avion di ALM buelo 980 a baha den laman djis pegá ku St Croix, oséano Atlántiko. E buelo a sali for di New York John F Kennedy International Airport pa bai St. Maarten Juliana Airport. Pero el a terminá den laman lagando un saldo di 23 morto i 40 sobrebibiente, Tobias (Tito) Cordeiro, Wilfred (Boy) Spencer i Margareth Abraham tabata yunan di Kòrsou trahando komo steward, stewardess i Purser pa ALM na bordo di e avion aki. Dos di nan a sobrebibí i Margareth Abraham a fayesé den e aksidente. Tito Cordeiro ta kòrda e dia aki i awor ku e subi un avion e no ta lesa ni tende muzik pero ta sinta ketu ketu ora e avion ta lanta i baha. Esaki pa e skucha zonido di e avion. Tito a konta su eksperensia 2 di mei 1970.

 

Un buelo trankil na kuminsamentu….

E buelo a kuminsá mainta na New York, masha normal. Nos a lanta pa bai St Maarten i normalmente nos tin di baha na Bermuda pa nos tènk aserka pasobra e ruta ei tabata nèt nèt pa e avion bul’é i si ta yen ta baha na Bermuda yena kombustibel i pa sigui. Si no ta yen e por bula dirèkt. E dia ei tabatin 67 persona na bordo i a disidí ku ta bai St. Maarten dirèkt. Ya nos a pasa Bermuda kaba i e piloto a keda avisá pa no sigui bai St. Maarten pero desviá bai Puerto Rico. Promé ku nos a yega San Juan nan a bolbe yam’é bis’é pa bin St. Maarten numa pasobra airopuerto ta habrí. Nos a bolbe desviá pa bai St. Maarten. Tur esei ta usa fuel èkstra i riba un ruta ku ta kritiko kaba. Ora a yega St. Maarten e wer tabata kompletamente será, áwaseru tabata basha masha duru. E avion a purba baha un bia i no tabata por, e di dos bia i di tres bia tampoko. No tabata mira nada bo dilanti. A disidí di bai St. Thomas. Den e tres intentonan pa baha e avion a usa fuel èkstra, pasobra tin di primi full tròt pa e avion bèk.

Tiki kombustibel…

Bayendo St. Thomas a sali na kla ku e avion no tabatin hopi fuel. El a bisa Toren ku e ke bai e isla di mas serka ku tin i nan a mand’é St. Croix. Ya a kuminsá atvertí ku fuel ta kabando. E piloto a yama e purser, Boy Spencer pa prepará e pasaheronan pasobra “we might have to ditch”, palabranan di e kapitan.  Nos a kuminsá prepará e pasaheronan, yuda nan bisti vèst, kon ta sinta i tur kos ku bo ta hasi ora di ‘flight safety’.  “Margareth tabata den kabina, ami tambe tabata den kabina i mi ta kòrda kla kla ku tabatin dos mucha di manera 7 pa 8 aña ku nos a bisti ‘zwemvest’ pa yuda nan.  Dado momentu mi  a bai dilanti pasobra nos mester a saka un ‘dinghy inflatable’. Ora bo ta haña indikashon  di aksidente, e kapitan òf ko piloto ta ‘suppose’ di duna dos komando. Unu ta bisa bu ‘emergency station’ ku ta nifiká ku kada miembro di tripulashon ta bai nan emergency station, Boy Spencer ta dilanti, ami mei mei na e ala i defuntu Margareth te patras na rabu di e avion. Despues e kapitan ta bisa ‘Brace for Impact’. E ta nifiká ku ta buk pasobra ta bai dal. Niun di e dos komando ei no a duna nos i esei tabata un fayo grandi pasobra nos ta asina di trein pa e kos ei ku bo ta keda hasi bo kosnan te ora bo tende e komando ei i den nos kaso e no a bin”.


Impakto fuerte….

Boy Spencer i Tito tabata den e parti kushina te dilanti pegá ku cockpit i defuntu Margareth mei mei ta yuda hende. E di tres hende den cockpit, ku su boka a grita ‘sit down sit down’. Tito i Boy a tende pasobra nan tabata pará einan pero patras no ta tende. E mester a usa e ‘public address’ pa henter e avion por a tende. Despues nan a bisa ku e ‘public address’ tabata daña. Ora a grita pa sinta, Boy su lugá ta nèt einan i el a habri stul i kai sinta. Tito ku ta den e kushina di e avion pará, el a wak pafó dor di un bentana rondó i ya el a mira awa manera ta e flur esei tabata. “Mi mester a kana mitar avion bai patras pero lo mi no a hal e i mi a sinta riba  flur i manera mi a sinti e avion a dal. Despues Boy ta konta mi ku ora el a sinta, i e kue e seatbelt pa mar’é i e avion a dal, su man no por a bin dilanti dor di e forsa di brek di e avion.

 

Avion a senk lihé….

I ora bo dal kos ta habri i dal i asina e avion a para ketu nos a purba habri porta pa saka pasahero pero e porta no kier a habri. “E porta di kushina si e man a bai mitar i ku pia mi a dal e i e porta a habri i nos a saka hende bai pafó. Manera e avion a dal i para ketu ya awa tabata na mi ènkel. Ora e awa tabata na mi rudia mi a bai laman. Pafó bo ta keda landa bai for di e avion pasobra si e avion senk e ta ‘zuig’ i ora bo ta poko leu bo ta mira un avion riba awa i despues bai abou. Nos a keda landa pafó. Laman no tabata brutu pero ola haltu ta subi baha. Ora e dal bo ta wak awa so pero ora bo ta na haltu bo ta mira hende i bo ta purba landa bai serka nan. Nos tabatin boto di supla i nos a mara faha i purba keda huntu. Nos a mira e ko piloto i mi a puntr’é kon leu nos ta, el a bisa mas òf ménos 35 mia di kosta ku ta basta leu pa boto yega. Despues di un ratu awa a kuminsá kai. Pa nos suèltu ora nos a ‘ditch’ i tabata den laman un avion di Pan American (PanAm) tabata bula riba nos i el a keda bula rònt. El a keda drei rònt pa indiká nos posishon, despues un avion chikí a bin i keda bual i PanAm a keda bai. E avion ei asta a tira un boto di supla pero bientu a bai kuné. Nos a keda einan pasobra boto no ta yega mesora. A kuminsá bira 6 or i bo ta pensa si bira anochi kon nan ta haña nos mainta. Pero a bin un helikòpter.  Tambe un portavion di Merka ei banda i a manda helikòpter i Puerto Rico a manda helikòpter i nan a saka nos un pa un for di awa. Ora e helikòpter yena e tin di bai i bin bèk. Den tur e landamentu mi no a mira niun miembro di tripulashon eksepto e ko piloto. Bo ta wak si bo ta mira nan pero den un di nan un helikòpter riba mi i mi a mira Boy Spencer pará den dje. Te finalmente nan a saka mi for di awa i nos a bai St. Croix. E momentu ainda mi no tabata sa ku tin hende ku no a sobrebibí. Bo sa si ku tin hende ku dor di e impakto nan a muri”, Tito a splika.  Promé ku nan a sali nan a yuda saka tur hende ku por a sali. Hende bibu e ora ei.


Vários pasahero a muri dor di e impakto mes…..

Ora nos a sali ya no tabatin moveshon. Na e momentu ei nos no tabatin tinu di Margareth. Nos ta asina di trein pa skapa pasahero ku bo no ta ni pensa pa wak bo kolega e momentu ei.  E momentu ei ta pa saka boto i saka pasahero. Ora mi tabata den awa mi a bai buska pa sa unda Boy i Margareth ta.  Dado momentu tin historianan kontradiktorio. Dado momentu tabatin ‘hearing’ na San Juan i Merka i kaso dilanti d i hues i ora tin deklarashon ku un hende a bisa di a mira Margareth morto den avion, otro ta bisa di a mir’é saliendo for di e avion, otro ta bisa di a mir’é den laman, i bo no sa ta kua di nan. I no a rekuperá nan i tampoko e avion. E tempu ei no tabatin teknologia pa bai abou i buska e avion. Ta bisa ku e laman tabatin basta tribon, pero Tito no a mira esei. Komo ku e laman tabatin hopi ola, nan ta bai abou i mi no tin masha idea di esei. Ami no a mira i tin hende ku tabatin raspá, ami mes ku raska ku sanger ku nan ta bisa ta atraé tribon pero mi no a mira ètòl.  No a saka hende for di laman, un a yega San Juan i a muri na hospital. Tito ta kòrda ku su djadumingu un pakus a habri pa nan spesial pa nan por skohe algun paña. I despues di algun dia nan a bin Kòrsou den un avion mesun tipo ku a kai den laman.

 

Ketu ketu ora di lanta i baha….

Tito ta kòrda ku e no sa kon el a drenta avion atrobe. E sa ku el a drenta avion i bin Kòrsou. E por kòrda kon e tabata sinti ora el a drenta avion òf ora e lanta òf baha. Awor si Tito por bisa ku pa hopi aña kaba semper ora e biaha, ku ta loke e gusta hasi, semper nunka ora di lanta i baha e no ta papia, ni lesa nada nada. E ta ketu pa e skucha pasobra e konosé zonido di avion. Dor di hopi aña e sa kiko ta pasando i e ta atento. Semper e ta stòp di hasi loke e ta hasi i ta atento.

 

10 luna bulando…

Tempu ku e avion a kai Tito tabatin 10 luna bulando. ALM mes tabata e tempu ei 6 aña ta eksistí i di kual un aña el a pasa kasi kompleto den man di gobièrnu. Tito ta kòrda ku ALM e tempu ei a tuma 2 hende na 1969 for di Aruba, nèt despues di 30 di mei. Nan a haña entrenamentunan hopi intensivo i pisá pa traha riba avion. Den e  kaso di e aksidente ta e dos komandonan ariba menshoná ta esnan ku a faya kuné. Si e dos komandonan ei a bin kisas hopi ménos hende lo a muri, segun Tito. I apesar di e aksidente Tito a keda traha 8 aña mas riba avion. E tabatin apénas 20 aña i tabata hopi hóben. E aksidente no a lag’é ku pániko di bula. E sa ku tin hende ku pasa ku kos den avion lo no ke drenta avion mas. Por ehèmpel Boy Spencer no a bula mas. Su reakshon tabata otro for di Tito, pa loke ta traha riba avion.

 

Ken su falta….

Ken finalmente tabatin falta di e aksidente? Tito; e kos ei yama ‘samenloop van omstandigheden’. Hopi promé ku nos a ‘lease’ e avion a bisa ku ta bai konstruí un tanki èkstra pa fuel. Esei no a sosodé nunka. Einan kaba a kuminsá e sirkunstanshanan ku kisas un dia e avion lo haña algu pasobra mester tabatin un tanki mas. E avion lo por  a hañ’é den problema bayendo New York pasobra St. Maarten semper tin bon wer. New York si ta diferente i tin bia mester desviá e avion. A ferwaktu ku e avion lo por a haña problema na New York. Pero a sosodé nèt kontrali. No tabatin un tanki èkstra, e dia ei no a baha na Bermuda pa tènk aserka, a desviá e avion pa San Juan, i ora di bai St. Maarten bèk wer tabata malu i a purba baha 3 bia, ta kada bes sirkunstansianan ku ta kere esaki ta e bon desishon ku finalmente no tabata un bon desishon. Pa bisa ta ken su falta, ta hopi hende por menshoná pasobra ta kada kos ku a pasa tabata supuestamente bon desishon i finalmente a resultá ku e fuel a kaba.

 

Margareth su último buelo….

Tito ta kere ku ta importante pa e duna atenshon na defuntu Margareth ku a pèrdè su bida kumpliendo ku su trabou di purba skapa bida di hende pero debí na sirkunstansianan e no a sobrebibí. E tabata bai kasa na yüni di e mesun aña ei. Tabata su delaster buelo pasobra ta bai e tabata bai pa kasa i e kos aki a sosodé. “Mi ta kontentu ku el a haña i ta haña e atenshon debido pasobra loke el a hasi ta algu grandi”.

 

 

Hamas lo mi lubidá….

Tabatin momentunan i hendenan riba e buelo ku Tito lo no lubidá nunka mas. El a papia na prinsipio di dos mucha muhé, segun e nan ta ohochi, kabei largu blònt, ku brel poko diki di mas òf ménos 7 pa 8 aña. Nan no a sobrebibí e buelo. Tito ta kòrda e dos muchanan aki te awe. Nan no a ni sali for di e avion. Sierto kos ta kla den bo mente i Tito ta kòrda un señora di edat ta wanta na e boto di supla (dinghy) i e no por a wanta riba awa.  E ‘zwemvest’ ta keda na laira i komo bo tin paña bistí bo ta keda bai abou i e señora no tabata por. Tito ta kòrda ku e tabata pone su rudia na atras di e señora pa e no bai abou. Ta kos ku e ta kòrda kla kla. I tambe e ta kòrda kon e ta mira e avion senk bai bou di awa. Ta kosnan ku hamas e lo lubidá.

 

 

 

SHARE

LEAVE A REPLY