WASHINGTON (AFP).- E almirante norteamerikano ku a ordená un di dos atake riba un “boto di droga” den Karibe pa mata e dos sobrebibientenan a komparesé ayera den Kongreso, kaminda a kuestioná e legalidat di su desishon. Kongresistanan republikano i demokrat a evaluá e atake ei, ku por konstituí un krímen di guera ku a kaba ku bida di 11 persona na bordo dje lancha dia 2 di sèptèmber.
E hefe di Komando di Forsanan di Operashon Spesial ,Bradley, a presentá na kongresistanan tras di portanan será un video dje di dos atake. E video ei ta mustra forsanan militar norteamerikano atakando e hòmbernan noufragá, segun e representante demokrat, Jim Hines.
“Ta un dje kosnan di mas kruel ku m’a mira den mi bida komo sirbidó públiko”, el a agregá. E promé misil a destruí e boto, i despues un di dos misil a mata e dos sobrebibientenan. E video a mustra dos individuo desesperá, sin medio pa move, riba un barku destruí, i kendenan a keda asesiná pa Merka”, segun Hines.
E senador republikano, Tom Cotton, a bisa ku tabata “un atake legal”. Opositornan demokrat i organiashonnan di defensa di derechinan humano ta akusá Pentagon di a kometé un krímen di guera matando e dos sobrebibientenan.
