WINDER, USA (AFP).- Un alumno di 14 aña a mata dos studiante i dos dosente den su skol sekundario den zùitost di Merka promé ku el a keda detené pa outoridatnan. “E outor dje disparo a keda arestá”, segun Chris Hosey, direktor di Ofisina di Investigashon di estado di Georgia, kaminda e asesinato a tuma lugá.
“Ta trata di un alumno di 14 aña. “Lo e keda prosesá pa asesinato i husgá komo un adulto”, segun e funshonario den rueda di prensa dilanti dje sentro Apalachee, na 70 kilometer nortost di Atlanta.
Ademas dje kuater mortonan (dos studiante i dos dosente), nuebe otro persona a resultá heridá.
Tabata mainta 10:20 ku yamada di emergensia a drenta dje tiroteo.
“Ora ku el a haña su mes dilanti di un agente di seguridat dje sentro, e outor dje tiroteo a tuma nota ku polis lo tir’é si e no entregá”, segun Jud Smith, e sheriff lokal. El a tira su arma abou na suela i e ofisial a arest’é.
Imágennan di medionan di komunikashon a mustra bastante alumno konsentrá den un stadion, promé ku nan por a reuní ku nan famia. Segun un dje studiantenan hopi hende a kere ku a trata di un ehersisio.
Merka ku frekuensia ta keda batí ku tiramentu den skolnan. Den mei di 2022, 19 mucha i dos dosente a muri den un matansa den un skol di Uvalde, Texas, matá pa un hóben di 18 aña kende a usa un rifel ku el a kumpra legalmente.
“Despues di dékadanan sin akshon, republikanonan di Kongreso mester bista “ta basta awor” i traha huntu ku demokratnan pa aprobá un lei di sentido komun riba seguridat di armanan”, segun presidente Joe Biden a bisa den un komunikado.
