Finchi Statia: No tin rèspèt mas den kurá di skol
WILLEMSTAD.- Miedu. Esei ta e promé sentimentu ku ta drenta Elfrin ‘Finchi’ Statia ora e tuma nota di e último akto di agreshon na skol kaminda un alumno a saka kuchú pa un otro i e maestro ku a bai para e pelea a sali heridá. Statia a traha hopi aña den enseñansa i ta bisa ku tempu por mira kon aktitut di alumnonan a kambia i ku por a antisipá ku situashon lo sigui kambia.
“Awendia e trabou pa maestro di skol no ta nada fásil. E maestro di skol a pèrdè su outoridat”, Statia ta duna di konosé den e podcast 3’or ku Gino. E ta mustra ku mundu den su totalidat a kambia, pues e alumnonan tambe a kambia, pero di otro banda e maestronan di skol tambe a kambia.
Un punto di kambio serka maestronan di skol ku Statia ta mustra riba dje ta nan manera di bisti. “Esei tambe ta bisa algu. Un mucha tin ku sinti ku el a yega skol i ku den kurá di skol ta lugá di edukashon kaminda tin òrdu i rèspèt.”
Na opinion di Statia prinsipalmente e konsepto rèspèt a kambia por kompletu. Tambe e ta enfatisá ku mester biba ku regla, pero awendia ta basilá hopi ku regla. “Awendia ta lihé pa bisa ku ta mucha nan ta, ku ta biba den époka moderno, i ku kosnan a kambia.”
Ta hustamente esaki segun Statia ta e problema i ta mustra ku e sistema bieu a funshoná miéntras ku awendia kosnan ta sali for di man. “P’esei e rèspèt mester keda na kas i tambe na skol.” Relashoná ku e kaso di siman pasá djabièrnè, Statia ta di opinion ku a sali muchu fásil for di e situashon.
“Si tabata algun aña pasá, djaluna último Kòrsou lo tabata plat. Banda di skol otronan manera shofùrnan di bùs i Aqualectra tambe lo tabata plat. Pero, hustamente pasobra ta sali fásil for di e tipo di situashonnan aki e problemanan ta sigui oumentá. No por ku ta sali fásil asin’aki for di e problema aki, i bida ta sigui normal.”
Na su opinion mester a para tur kos, atendé ku e problema mesora, yega na solushonnan, pa despues sigui. E ta mustra ku ta vários otro kaso mas tin ku ta pasa na skol. “Si warda nan den lachi na ta sigui bira un problema.”
E ta teme ku despues di e insidente ku kuchú aki kosnan lo sigui bira pió pa e manera kon ta atendé ku e kaso. Na su opinion for di djabièrnè mester a aktua di tal forma ku e alumnonan a sinti e dia ei mes ku hendenan grandi a tuma un desishon.” Aworakí nan no a sinti esaki miéntras ku grandinan ta diskutí ketu bai aya banda kiko tin ku pasa.”
