WILLEMSTAD.- Direktiva di Asosiashon di Músiko di Kòrsou (AMAK) a risibí e notisia tristu di fayesementu di su èks-miembro di direktiva i músiko Stanley Reinilia.
Stanley Reinilia tabata un figura ku a laga su marka den mundu di músika di Kòrsou, no solamente komo músiko, sino tambe dor di su kompromiso ku AMAK i ku e desaroyo di e komunidat di músikonan di nos isla.
For di 9 di aprel 1981, Stanley Reinilia a keda eligí komo miembro di Direktiva di AMAK. E kompromiso akí a dura te ku novèmber 2022, loke ta representá mas ku 41 aña di servisio den e direktiva. Durante su periodo, e tabata sirbi komo komisario, i tabata enkargá spesialmente ku e parti sosial i bienestar di e miembronan di AMAK.
Su envolvimentu ku organisashonnan musikal no a limitá su mes na AMAK. For di 14 di mart 1991 te ku novèmber 2022, Reinilia tabata tambe miembro di Direktiva di Curaçao Festival Center.
Un músiko ku su raisnan den historia di AMAK
Stanley Reinilia tabata un di e músikonan ku tabata hopi envolví den e desaroyonan ku a kondusí na e lantamentu di Asosiashon di Musiko na 1968. E historia akí tabata importante pa Reinilia, i su kompromiso ku AMAK a keda visibel durante hopi dékada.
E tabata tambe un di e miembronan ku tabata bishitá reunion di AMAK regularmente. Su presensia no tabata solamente komo miembro di direktiva, sino komo un persona ku tabata interesá den e bienestar di su koleganan músiko i den e futuro di e organisashon.
Un partisipante fiel di Festival di Tumba
Reinilia tabata un di e músikonan ku a partisipá den Festival di Tumba, for di e periodo ku e festival tabata tuma lugá den Roxy. Den un di su partisipashonnan, el a logra un segundo puesto.
Durante e añanan ku el a partisipá den Festival di Tumba, Stanley semper tabata presentá su mes ku entusiasmo. Su partisipashonnan a laga tambe algun momentu inolvidabel i hasta poko chistoso, ku a forma parti di e ambiente i di e historia di e festival.
Pa hopi hende, Reinilia tabata un músiko ku tabata konosé e esenario i ku tabata disfrutá di e ambiente musikal di Kòrsou.
Combo C i e grabashonnan ku a keda den memoria
Un parti importante di su trayekto musikal tabata su envolvimentu den Combo C, bou di direkshon di e defuntu Jan Clara.
Ku Combo C, Reinilia a partisipá den diferente grabashon. Un di e grabashonnan ku a bira hopi popular tabata “Mi no por keda afó”, un interpretashon ku a keda den memoria di hopi amante di músika di Kòrsou.
Su nomber tambe ta apareee den diferente registro di grabashon i partisipashon musikal di e époka, loke ta mustra e amplitut di su aktividat komo músiko durante e añanan.
Orguyoso di su famia
Fuera di su bida komo músiko i dirigente, Stanley tabata un persona ku tabata hopi orguyoso di su famia, spesialmente di su yunan i nan logronan den komunidat.
Pa esnan ku a konosé Stanley, su persona tabata konektá ku su amor pa músika, su kompañerismo ku otro músikonan i, prinsipalmente, ku su kompromiso di hopi aña ku AMAK.
Durante e último añanan, Stanley a konfrontá algun problema ku salú. Despues di un periodo difísil, el a fayese ayera, 19 di ougùstùs 2026. Su fayesomentu ta un pèrdida pa su famia, pa AMAK, pa su koleganan músiko i pa e komunidat musikal di Kòrsou.
Direktiva di AMAK ta ekspresá su mas sinsero palabranan di kondolensia na señora Jeanette, na su yunan, otro miembronan di famia i na tur su kolega músiko ku durante tantu aña a traha i kompartí e mundu di músika ku Stanley Reinilia.
AMAK ta deseá nan hopi forsa i konsolashon den e momento doloroso akí.
Stanley Reinilia, un bida dediká na músika, AMAK i su koleganan.
