NEW YORK, AP.- Amazon, kual a enfrentá preshonnan polítiko i ekonómiko pa oumentá salario pa míles di empleado, lo oumentá salario mínimo pa tur su trahadónan den Merka. Esaki lo ta 15 dòler pa ora desde otro luna. E kompania a indiká ku lo boga pa un oumento di salario mínimo federal, kual ta 7,25 dòler pa ora aktualmente.
E oumento di salario lo drenta na vigor na momentu ku Amazon kontratá mas di 100.000 empleado temporal pa e periodo di Pasku pa paketá i manda produktonan pa su bodeganan. E empresa ta enfrentá un merkado laboral pèrtá den kasi dos dékada. Esaki ta hasié difísil pa atraé trahadó, kual tin mas opshon.
Amazon a indiká djamars ku e oumento lo benefisiá mas di 350.000 trahadó, un total ku ta inkluí empleadonan full-time, partaim, i temporal. E empleadonan di Whole Foods, e kadena di supermerkado ku ta parti di Amazon, lo haña e mesun oumento. E empleadonan di servisio na kliente, algun di kual ya ta gana 15 dòler pa ora, tambe lo haña un oumento segun indikashon di e kompania.
Amazon a enfrentá kritiká fuerte di gruponan di derechi laboral i otronan tokante salario i kondishonnan di trabou. Un di su krítikonan mas severo ta e senador independiente Bernie Sanders. Su kuenta di Twitter, kual tin kasi 9 mion siguidó, frekuentemente ta papia tokante e pago abou di e empleadonan di Amazon i e fortuna enorme di Bezos.
