Un ‘screenshot’ for di televishon cubano ta mustra e presidente dje isla, Miguel Diaz-Canel (d) i e minister ruso di asuntunan eksterior, Sergey Ryablov (r) durante di un reunion na Havana dia 9 di aprel último.
LA HABANA, Cuba (AFP).- Amnistia Interashonal a eksigí pa Cuba duna transparensia den e proseso di liberashon di prezunan. Ta hasi un luna ku a duna inisio na e liberashon despues di negoshashon ku Vatikano, mediadó históriko entre e isla i Merka. La Habana, meimei di tenshonnan fuerte ku Washington, dia 12 di mart a anunsiá ku komo muestra di “bon boluntat” pa ku Vatikano, nan a liberá 51 prezu.
Dia 4 di aprel gobièrnu di Cuba a anunsiá pordon pa otro 2.010 persona, un “gesto humanitario i soberano” meimei di selebrashonnan di Siman Santu. “E medidanan ta keda marká pa falta di transparensia, sin garantia di liberashon kompleto ni di rèspèt efektivo pa derechinan humano”, segun Amnistia Internashonal den un komunikado.
Segun e organisashon di derechinan humano, te ku ayera gobièrnu kubano no a publiká e lista di esnan benefisiá. E direktor pa Amérika Latina dje organisashon, Ana Piquer, sitá den e dokumento, “a pidi pa stòp ku e uso di libertat komo moneda di kambio polítiko”, miéntras ku La Habana i Washington ta mantené negosiashonnan pa aliviá e tenshonnan bilateral. ”A yega ora pa sustituí e anunsionan parsial, revokabel i sin garantia ku e liberashon inmediato i inkondishonal di tur persona ku ta prezu djis pa motibu di a hasi uso di nan derechinan humano”, segun Piquer.
Amnistia Internashonal mas aleu a bisa ku “ningun dje personanan” ku e organisashon a rekonosé komo “prezunan di konsenshi” a keda liberá den e proseso resien, entre nan e artista disidente Luis Manuel Otero Alcántara i e ‘rapper’ Maykel Castillo Perez, konosí komo “Maykel Osorbo”.
E presidente kubano Miguel Diaz-Canel den entrevista resien ku NBC a bisa ku no ta eksistí prezunan polítiko na Cuba.
