EL CAIRO, AP.- Amnistia Internashonal a pidi gobièrnu oksidental pa stòp di suministrá arma na e gruponan den konfrontashon na Yemen, despues di indikashon ku esakinan ta resultá den man di gruponan ekstremista.
“E proliferashon di milisianan” na Yemen respaldá pa Emirato Arabe Uni “ta hasiendo e krísis humanitario mas grave i ta forma un menasa kresiente pa e pueblo sivil”, segun indikashon di Patrick Wilcken, investigadó di e organisashon internashonal di derechi humano.
Segun Wilcken, e armanan merikano i britániko a yega den man di al-Qaeda i Estado Islámiko. Emirato no a duna komentario riba e akusashonnan.
E koalishon liderá pa Saudi Arabia, kual ta inkluí Emirato, ta kombatí desde aña 2015 kontra rebeldenan shiita na Yemen, konosí komo huti i kual ta konta ku sosten di Iran.
Alemania, Ulanda i Noruega tin akuerdonan di arma restringí ku miembronan di e koalishon, miéntras ku vários otro pais oksidental, inkluyendo Merka i Gran Bretaña ta sigui proveé arma.
E guera na Yemen a laga míles di persona morto i a desplasá mas di 3 mion. E kombersashonnan di pas a kuminsá aña pasa na Suesia.
Un monitòr di Nashon Uní tambe lo reuní ku e gruponan den guera riba un barku ankrá na kosta di Yemen, pa asina purba yega na un akuerdo di e retiro huti di siudat Hodeida. Esaki ta un siudat stratégiko kual ta kontrolá e akseso na nort di e pais.
