WILLEMSTAD.- No ta asina ku ta na mart awor tur trahadó ku tuma retiro boluntario mester bai. Nan tin di indiká esaki si pa luna di mart i nan tin henter 2020 pa disidí kua luna nan ke baha. Esaki EXTRA a komprondé for di entrevista ku nos a hasi ku Celeste Johannes direktora rekurso humano di BPD.
Sra. Johannes a splika EXTRA ku na 2016 edat di penshun a subi pa 65 aña. Tin trahadó ke sigui traha pasobra asina nan ta akumulá mas pa nan penshun. No ta asina ku e trahadónan aki tin gana di keda traha, pero nan ta hasié pa e sèn. E trahadónan aki a informá gobièrnu ku si tin kompensashon pa nan i ku nan no ta sinti e klap finansiero asina tantu si nan baha tòg, nan lo por baha.
E direktora a bisa EXTRA ku no ta asina ku tin hende di mas òf ku tin problema finansiero p’esei e hende tin di bai, pero gobièrnu ke duna un insentivo na e hendenan ku tin gana di baha ku penshun for di awor.
Sra. Celeste Johannes a sigui bisa ku ora e lei kaba di haña su konsehonan i para parlamento, e intenshon ta pa kuminsamentu di otro aña nan duna e trahadónan 3 luna pa nan pensa si nan ta bai e retiro boluntario òf no. E ta konta pa e trahadónan ku a nase entre 1957 i 1960. Esaki ta nifiká ku si e lei pasa na yanüari, e trahadónan tin te mart pa pensa pa hasi uso di e areglo. I nan por skohe pa hasi uso di dje durante kualke luna di 2020, te ku desèmber si nan ke. Ta nan ta skohe kua luna nan ke baha.
Ku esaki e direktor a enfatisá ku no ta asina ku ta na luna di mart awor tur trahadó ku opta pa e areglo mester baha.
Loke gobièrnu ke sa si ken ta esnan interesá pa baha pa asina nan traha un análisis di e impakto ku e ta trese kuné. Esaki teniendo na kuenta di e trabou ku e hende ta hasi por ehèmpel si ta polis i trahadó di brantwer, gobièrnu ke sa delantá pa asina por remplasá nan.
Gobièrnu ke hasi e análisis di impakto aki na luna di novèmber awor. E ámtenarnan ta hañando nan kalkulashon i a base di esei gobièrnu ta puntra si nan ke hasi uso di e areglo.
