Amtenarnan a haña mitar dia liber riba 23 i 30 desèmber

WILLEMSTAD.- Djárason Konseho di Minister a bai di akuerdo pa duna ámtenarnan ayera djabièrnè 23 desèmber i dia 30 desèmber mitar dia liber. Tabata djaweps anochi ku e notisia aki a keda pasa pa tur ámtenar.
Manera ta konosí e sindikatonan ABVO, i NAPB a kondená fuertemente e suma di 135 florin di bónus ku gobièrnu ta duna ámtenarnan e aña aki atrobe. Pasombra nan ta haña ku despues ku e ámtenar a traha duru presta servisio no por premiá ku un bónus hopi abou asina.
Wendey Calmes di ABVO di su banda hasta a kondená ku e 135 florin tabata mara tambe na e echo ku e ámtenar bispu di Pasku i Aña nobo ta haña mitar dia di trabou. sinembargo e aña aki e fechanan menshoná ta kai djasabra, dia ku tur servisio tabata sera, Señor Calmes a pidi gobièrnu sikiera e ora ei duna e ámtenarnan liber dia 2 yanüari.
Despues di e publikashonnan aki, djaweps anochi ámtenarnan a haña notifikashon ku ayera djabièrnè 23 desèmber i dia 30 awor nan tin mitar dia liber.
EXTRA a papia ku sr. Wendy Calmes kende a bisa ku nan ta satisfecho pa duna, dos mitar dia liber, pero tòg e bónus ta keda e punto prinsipal. E ta spera ku ora gobièrnu nobo sinta, por haña apertura pa papia asuntu di un gratifikashon di Pasku hustu pa empleadonan públiko.

SHARE

LEAVE A REPLY