…Sra. Royla Pierre Direktora General di Direktiva di Skolnan Katóliko…
WILLEMSTAD.- Apesar dje situashon di pandemia di Covid-19 i tur e retonan ku sektor di enseñansa a konfrontá kuné, aña eskolar 2020-2021 tabata mas mihó ku nunka, di akuerdo ku direktora general di Direktivanan di Skol Katóliko sra. Royla Pierre.
Sra. Pierre a bisa EXTRA ku e ta orguyoso di tur studiantenan, maestro i dosentenan, pasombra e aña aki e resultadonan tabata mas mihó ku nunka. E porsentahe di studiantenan ku a slag ta hopi haltu, riba 80% i ta un prestashon masha bunita.
P’esei e direktora ta kontentu ku apesar e aña eskolar tabata un aña di reto, maestro/dosentenan i studiantenan mester a dil kuné.
“Ta manera bo ta den un laman brutu i ta un chup bo tin pa yega kantu. Ta meskos ku tira un hende den laman brutu, e ta siña landa. I no tin un mihó manera pa siña for di e situashon di pandemia aki”.
Tantu mayor komo e mucha a eksperensia strès di sigui lès na kas. Dor ku e muchanan tabata haña lès na kas, mayornan tabata muchu mas tantu envolví ku nan yunan ku maestronan i dosente. Pasombra awor ku e mayor ta na kas, e ta wak kon e yu ta sigui lès via kòmpiuter. Asina e mayor mes a tuma nota kuantu kos ta keda hasi den klas pa trèk e yu p’e yega na resultado positivo. Pues tur esfuerso pe yu logra. Awor mayornan a mira i nan tambe a bai yuda nan yunan. Mayornan ta balorá e trabou dje maestro/dosente mas.
Mas aleu sra. Pierre a bisa ku banda di wak e yu haña lès, tabatin un bon kolaborashon entre mayornan ku maestro/dosentenan, kompará ora situashon tabata normal, hopi mayor tabata na distansia. Den e situashon di pandemia, e mayor a hañ’e ta atendé ku dosente i maestro. Esaki a yuda engrandesé e relashon di kas ku skol.
E resultado di EFO na Direktiva di Skolnan Katóliko ta ku AGO a slag 61, VSBO 606 i HAVO ta 228.
Na HAVO MIL e porsentahe di slag ta 89.0% i Radulphus College 94.2%. E resultado total ta di 92.0%. Pa VWO na MIL ta 90.0% i Radulphus College ta 91.0% pa un total di 90.8%.
VSBO TKL St. Paulus 72.2%, Acilla Domini 74,3%, St Jozef ta 90,5% i Triniteit College ta 77.0% pa un total di 81,4%; nivel PKL na St. Paulus ta 72,3%, Acilla Domini ta 88.1%, Mari Stella 86,7% i St. Jozef ta 93.1%.; nivel PBL st Paulus ta 75.9%, Ancilla Domini 71,1%, Mari Stella 85.0% i St. Jozef 94.9%.
