HAVANA (AFP).- Gobièrnu di Cuba ayera a duna di konosé ku aña eskolar lo start djamars 1e di sèptèmber, apesar dje krísis di koriente ku e pais ta biba bou dje preshon fuerte di Washington. E Minister di Edukashon, Naima Trujillo, a rekonosé e “reto” pa kuminsá skol pa 1.4 mion alumno debí na e falta di koriente i e problemanan di transpòrt dje isla.
Ayera e kompania estatal Union Electrica de Cuba a reportá un blackout masivo den parti ost dje isla debí na fayo den e ret di koriente, ku a afektá e provinsianan di Holguin, Granma, Santiago de Cuba i Guantámano.
For di yanüari, Merka a imponé un blokeo pa suministro di kombustibel na e isla komunista, loke a hasi mas grave nan problema di koriente ku ya tabata kousa sufrimentu bou dje 9.4 mion abitantenan dje isla.
