Proyekto Parke Muizenberg i otronan ta bèk riba mesa

WILLEMSTAD.- E proyekto di un parke di beisbòl na Muizenberg a bolbe subi mesa. Andruw Jones ta desidido pa realisá e proyekto aki, pero te hasta mas ku esei. Un vèlt di beisbòl adaptá pa siudadanonan ku desabilidat físiko tambe ta den tapara pa keda realisá, ademas di drecha algun vèlt di beisbòl, segun e eks-pelotero a duna di konosé na Mundu Deportivo.

Tabata komo 3 aña pasá ku Mundu Deportivo a amplia riba un parke na nivel di Tripel A ku Andruw lo a konstruí na Muizenberg, kaminda tabatin little league ballpark. Despues dje publikashon ei, vários desaroyo a tuma lugá. Inkluso  e posibilidat pa Andruw Jones djòin C.P.A. den un proyekto turístiko deportivo multi mionario den área di Rif. ‘Commercial wise’ e proyekto ei lo a kumbiní, segun Ramon Koffijberg kende ta atendé asuntunan di Andruw Jones. Sinembargo, e proyekto di Rif ta bin kai afó i Andruw ta bolbe pone atenshon riba Muizenberg.

“Mi soño di hopi aña, duna bèk na nos hubentut”

Durante entrevista ku Koffijberg na redakshon di EXTRA, nos por a papia di forma ekstenso via telefòn ku Andruw Jones. E eks- pelotero a trese dilanti ku semper tabata su deseo pa duna bek na hubentut di Kòrsou. “Ta mi soño di hopi aña”. Echo ta ku a bin algun kambio den e proyekto di Muizenberg, pues esaki lo no bira un parke na nivel di Tripel A. “Nò, e midínan di vèlt ta nivel di Tripel A di manera ku tur nivel di beisbòl por us’é. Pero no ta hinter e fasilidat lo ta na nivel di Tripel A. “E fasilidat mester yuda pa nos ekiponan tin un mihó vèlt pa nan train, ku chèns ku nos por sigui produsí mas pelotero profeshonal. “Hopi ta esnan ku a yega MLB despues di mi. Pero mi tin sigur ku hopi mas por hasi esei”, segun el a duna di konosé.

Pues ademas dje parke na Muizenberg, ta e intenshon pa drecha algun vèlt i tambe realisá e fasilidat pa e grupo spesial di siudadanonan ku limitashon físiko. “Nan tambe ke hunga beisbòl. “Mi ta pensa riba un vèlt ku por tin suela di rùber di manera ku si nan kore kai, nan lo no leshoná”.

Andruw no ke mara su mes na tempu. Aktualmente e parti di diseño dje parke na Muizenberg ta tumando lugá. Tambe e ta reglando asuntu di un fundashon, ya ku ta e intenshon pa for di Merka haña yudansa pa e proyekto ei. Di parti di Atlanta Braves ya tin señal positivo pa posibel partisipashon.

Andruw a asentuá ku ora menshoná nòmber di Kòrsou den beisbòl na Merka, e reakshonnan ta hopi positivo. Nos mester por saka probecho for di e situashon ei. Lo e hasi di su parti i aki na Kòrsou, Ramon Koffijberg lo ta su persona di konfiansa pa realisashon di su soño.

 

…Ramon Koffijberg; e ta enkargá ku kordinashon di proyektonan ku Andruw Jones ke realisá…

LAGA UN KOMENTARIO

Please enter your comment!
Please enter your name here