LA PAZ, AP.- Presidente interino Jeanine Añez a atvertí djabièrnè ku si e eks mandatario Evo Morales regresá e pais e lo wòrdu demandá pa froude elektoral, miéntras gobièrnu i e partido di Morales ta buska un solushon pa restourá pas na Bolivia i realisá elekshon meimei di protesta fuerte.
Morales “por bini bèk, pero e mester paresé dilanti hues pa froude elektoral. Niun hende no a ekspuls’é, ta su so a bai”, asina e mandatario a bisa den un reunion ku koresponsalnan.
Añez a rekonosé ku a realisá algun kombersashon ku legisladornan di partido MAS, kual ta kontrolá dos terser parti di Asamblea Legislativo, pa enkaminá e agènda legislativo, restourá trankilidat i organisá elekshon di nobo.
Morales a renunsiá djadumingu, preshoná pa diferente protesta den e pais kompleto pa supuesto froude den elekshon riba 20 di òktober, kaminda e mandatario a deklará komo ganadó. Un verifikashon di kontabilidat di parti Organisashon di Estadonan di Amérika (OEA) a deskubrí diferente iregularidat den elekshon.
Sindikatonan leal na Morales ta protestando diariamente pa rechasá Añez i ta pidiendo regreso di e eks mandatario. Mas di 100 persona a keda detené djadumingu. Outoridat a konfiská plaka, palu, kuchú, eksplosivo i bòmnan fábrika na kas di manifestantenan ku a protesta den sentro di e pais.
