E echo ku su kolega Kaag a baha mesora a pone preshon riba Bijleveld

DEN HAAG.-Minister demishonario Ank Bijleveld a disidí tòg na baha komo minister despues di e moshon di desaprobashon ku Tweede Kamer a aseptá kontra di dje ayera. EXTRA a informa for di ayera momentu ku Sigrid Kaag, ku tabata e minister enkargá ku Asuntunan Eksterior a entrega su retiro na Rei despues di mesun moshon. Den prinsipio Bijleveld a ninga di baha, el a bisa ku e si ta keda kaba su trabou, sinembargo un dia despues el a disidí tòg na baha.

Ank Bijleveld(CDA) no ta un deskonosí na Kòrsou, vários hende lo ta korda Bijleveld komo sekretario di estado enkargá ku Relashonnan den Reino den e tempu di preparashon pa desmantelashon di Antia. Tabatin momentu ku Bijleveld tabata na Kòrsou den temporada di karnaval i a wak e marcha pará den Marchena.

Bijleveld ta atmití ku tin kosnan ku no a bai bon den hinter e trayekto di evakuashon di intérpretenan for di Afganistan. E ta insistí ku ketu bai su prioridat mayó ta pa trese e hendenan aki ku ainda ta na Afganistan. Den un reunion di Tweede Kamer di djarason anochi e miembro di Parlamento Kati Piri(PdvA) a entrega un moshon di desaprobashon a base di e forma kaótiko ku e evakuashon for di Afganistan a tuma lugá. Segun e miembro di Parlamento, Bijleveld no a hasi sufisiente esfuerso pa saka intérpretenan ku den pasado a hasi trabou pa e mishon ulandes den e pais den guera, miéntras ku na hopi okashon Tweede Kamer a insistí riba e punto aki.

Parlamento a vota riba e moshonnan di desaprobashon i aseptá esakinan ku un mayoria voto na fabor. E echo ku Kaag a baha mesora a sòru pa diskushon fuerte den direkshon di Bijleveld. E preshon ei a pone ku Bijleveld a disidí tòg pa baha. (foto; e minister flankia pa miembronan di defensa ulandes na Korsou)

 

 

LAGA UN KOMENTARIO

Please enter your comment!
Please enter your name here