WILLEMSTAD – Outoridatnan tabatin un anochi tras di lomba ku basta aktividat di asistensia. For di tempran ayera anochi banda di 9or Wardakosta tabatin un kontrol riba laman. Outoridatnan a para un boto di piskadó lokal kontrolá esaki pero despues a disidí pa trese boto na Parera pa un kontrol mas profundo. Awe durante dia lo a kontinuá ku e kontrol aki di e boto di piskadó. Den transkurso di dia lo tin indikashon di outoridatnan si a enkontra algu òf por laga e boto bai. Despues pa banda di 2or di mardugá polis mester a bai Kwartier pa un posibel kaso di atrako. Un tipo a drenta den un kas ku tabatin tres persona di edat. E abitantenan di e kas a kuminsá grita e atrakadó ku a maltratá un di e personanan di edat i pa despues kore bai. Nan no por bisa ku si el a bai ku algu pero nan tabata basta spanta. Un ratu despues alrededor di 2:30 am un dama ta pèrdè kontrol den bògt pa bai Freezone Hato i bòltu drenta roi i mondi ku su SUV. E dama no a resultá herida pero e outo ku a bai kompleto den mondi a haña basta daño material.
