Alba Chatlein i Katherine Filesia
E sektor di notario ta konstantemente den diskushon. Falta di notario, falta di hurista den e sektor aki ta loke ta pisa i ta trese komo konsekuensia ku aktanan no ta logra kaba asina lihé manera hopi ta spera. Pero e tin su motibu i ta e komprondementu nos tin di haña di esaki. Den e kuadro aki EXTRA a papia ku Alba Chatlein notario i Katherine Filesia notario suplente di e ofisina di notario Alba Chatlein.
18 aña komo notario
Dia promé di aprel Alba Chatlein a kumpli 18 aña komo notario. El a konta nos kon el a eksperensiá e trabou komo notario den e 18 aña ku a pasa. Segun Alba, tempu el a kuminsá, algu mas ku 18 aña, kos tabata totalmente otro. Semper ta identifiká hende ku ta bin, saka kopia di nan sédula òf pasaporte. Despues a bira ku nan no por trese kopia pero bo mes tin di saka un kopia i awor el a bira ku no ta solamente kopia ta pidi pero e hende mes tin di trese tambe su papelnan di kranshi kaminda por mira nan adrès, mester pasa tur hende den e skrining di Complaince. Esei ta solamente un kos ku ta e identifikashon di e kliente ta totalmente otro di loke tempu sra. Chatlein a kuminsá traha den e sektor notarial. I asina tin hopi desaroyo mas, por ehèmpel un akta di kompra i benta ántes tabata dos blachi i awendia kasi un buki. Ta desaroyonan pa protehá kliente i nòmber di pais kontra di labamentu di plaka.
Dikon un akta ta tarda
Teniendo na kuenta kuantu ta dura pa sera un akta awendia, nos kier a sa di sra. Chatlein si no tin otro manera pa e kosnan tòg por kana un tiki mas lihé. Segun su kontesta, hopi mas lihé no por pero loke si por yuda ta ku ora pidi e kliente sierto dokumento, ku e ta trese nan i no start un diskushon ku bo ta keda ariba abou pa haña e dokumento. Sin e dokumentashon no por hasi tòg nada. E pregunta di si por laga e dokumento kai no por, sierto tempu ta bai ku por a kaba otro kosnan mas lihé miéntras e diskushon ta kontinuá. Tambe sra. Chatlein a menshoná e hendenan ku no por warda nan bùrt pero kada bes ta keda interumpí si nan kosnan por kana mas lihé. E hendenan ei ta keda saka notario for di su konsentrashon pa algu ku no por. Otro faktor ku a kondusí na e tardamentu pa aktanan ta ku awor aki tin muchu ménos hende ta traha den notarial ku tempu sra. Chatlein a kuminsá. Antes tabatin tres i mei kantidat notario pa kada notario i awor aki tin apénas un pa kada notario.
Tiki interes
Dikon tin tiki hende ta traha den e sektor di notario awor aki, kisas e hende no ta interesá pa traha den e sektor. Sra. Chatlein a splika Djasabra ku tin ménos hende ta studia notarial i tempu el a studia e ta kòrda ku 20% di esnan ku tabata studia ta hende muhé i komo hende muhé si bo ke haña trabou bo mester a traha mas i tin biaha asta mas duru ku e hende hòmber. Awor aki 20% ta hende hòmber na Hulanda i e damanan na Hulanda mayoria ta partaim ta traha. Esaki ta trese kuné ku mester di muchu mas hende ku ántes i no ta stroba niun hulandes ku ke bin i e hendenan di nos ku bai studia ta habri porta i tene nan duru einan. Esei ta kousa e skarsedat. Awor aki segun sra. Chatlein tin e estudio pa 2 aña kaba pero te ainda no tin niun hende ku a kaba di studia. “Na 2007 mi a atvertí e dekano di e tempu ei na universidat na Kòrsou ku nos lo haña problema si no kuminsá eduká hende aki. Pero niun hende a mira e kos ta bini na e momentu ei. Mi a mira pasobra por a ripará for di e tempu ei kon difísil ta pa haña hende”.
Bin duna aporte na bo pais
Lo mester paga hende mas pa nan drenta e sektor? Sra. Chatlein a bisa ku e diferensia brutu entre Kòrsou i Hulanda por ta mas grandi pero neto no. Si wak kiko un kas ta kosta na Hulanda pa biba aden kompará ku aki ta grandi. Transporte ta mas karu na Hulanda. Kompará liter di gasolin aki ku na Hulanda i al final e ta haña ku e studiante tin obligashon moral ku su pais. Aki tin edukashon grátis, e komunidat aki a paga bo enseñansa di fundeshi te sekundario. E hóben tin mag di bin duna aporte. I remarkabel ta ku netamente esun ku ta grita su yu pa no bin bèk ta nèt nan ta grita mas duru ku esnan ku a bin bèk no ta yudando nan basta lihé. I esei ta lamentabel.
Djis trese loke pidi
Mester duna e hende mas informashon di kiko ta spera di dje komo kliente serka un notario i kiko tur e tin di presentá kuné. Duna mas informashon. Segun sra. Chatlein esei kisas ta un posibilidat pero si splika e hende spesífikamente ku mester di tal i tal i ku e tin pasa pa identifikashon, mester di prueba di adrès, prueba di kon a yega na e sèn ku ta usa pa kumpra, mester di tur eseinan sino komo notario ta keda tildá di ta yuda laba plaka. I den su kaso e no ke haña un tim di polis na su porta pa investigá. Sra. Chatlein a bisa ku ta un kompania di biahe so por poné lanta tempran pero no un tim di polis.
E kambio mas grandi
Den su 18 aña komo notario, sra. Chatlein a duna un bista kua lei/kambio ta esun ku e ta haña tabata esun di mas importante i ku a trese mas kambio den e sektor aki. El a menshoná ku ta ata hopi pero esun ku e ta haña mas benefisio ta e kambionan den derechi di herensia. Awendia hende por desheredá un yu si e ta haña nesesario i posibilidat pa regla sierto kosnan den un tèstamènt ku te ainda hende no ta hasi uso sufisientemente di nan. E posibilidatnan tei.
Regla bo tèstamènt
I lamentablemente hende te ainda ta wak tèstamènt komo un tabú. Pero esei no ta kuadra. Niun hende no ta muri ni un dia promé ku e tin di muri. Pero e diferensia si ta ku bo ta muri ku kos reglá òf no. Si tèstamènt tabata mata hende, el a bisa ku e mes lo a muri 30 aña pasá. I e sektor di notario a yega duna informashon riba tèstamènt. E ta kòrda un empresa di entiero a tene un siklo di informashon riba tèstamènt pero tin bia ta 5 hende den un sala full di 150 hende realmente ta regla esaki. Mester duna informashon pero e hende tambe mester por ke e informashon ei.
Antianisá
Mas aleu sra. Chatlein a papia di antianisá e sektor notarial. El a bisa ku esei mester sosodé i e ta kere fuertemente. No ta un saku di dròp bo ta bende komo notario pero relashon di konfiansa pa e kliente pa regla su kosnan. Nos hendenan no ta konta e historia kompleto tin bia pero por mir’é na nan ‘Body Language’ kisas ku tin un yu no ta masha bon mucha. I esei bo no por yega i puntra brutu pero e mester sosodé nèchi sino e hende ta klap sera. Pero si bo no sa e historia kompleto bo no por regla un kos bon pe. I p’esei ta importante pa e hende den notarial komprondé e kultura pa e yuda e hende optimal. No ta kuestion di no ke mira sierto hende den e sektor pero e hende mester komprondé e kultura i “bo ta komprondé si bo roots ta aki”.
Katherine: “Mi a hasi un bon eskoho di bin Kòrsou”
Katherine Filesia ta e hóben notario suplente na ofisina di notario Alba Chatlein. Na diferente okashon nos a yega di papia kuné promé ku el a kuminsá traha aki i awor el a konta nos kon e ta eksperensiá e trabou na Kòrsou. E ta traha aki for di aprel i manera el a bisa nos ku e ta gosa di e trabou. El a traha hopi aña na Hulanda den notarial i pafó di dje i el a disidí di tòg keda den notarial, i e trabou ta dushi. Si kompar’é ku Hulanda esun na Kòrsou ta mas general i na Hulanda mas spesífiko. E hendenan den e rango kaminda e tabata traha ta otro kaminda e hende mes ta buska su informashon i bin kuné. Pero na Kòrsou tin tur sorto di hende, e empresario i tur dos di otro i diferente akta ku tin di traha, Kompará Kòrsou ku Hulanda e ta haña di a hasi un bon eskoho pa bin aki pasobra bo ta haña di tur kos un tiki.
Konsientisá nos hóbennan
Banda ku Katherine a doktorá den lei notarial spesialisá den Trust el a bisa di ta afiliá na universidat di Leiden i tambe esun na Kòrsou i por mira ku tin tiki hende ta studia lei notarial. Na Hulanda aña pasá tabatin 30 studiante a kuminsá i kisas un di Karibe i kisas ni di Kòrsou i si wak despues di 4 hende ta kaba kisas 15 pa 17 i si haña un di Kòrsou mes ta un den tantu aña. E no sa dikon esaki ta bin pasobra na Hulanda i na Kòrsou e estudio no ta asina konosí. E mes a kuminsá ku Rechtsgeleerdheid i despues lei notarial den práktika i ta ora el a bai traha na Rechtswinkel i a bishitá un ofisina di notario na Hulanda, el a bin haña sa presis kiko un notario ta hasi. Komo hopi hende no sa kiko un notario ta hasi p’esei no ta hasi e estudio. Por ehèmpel un abogado bo ta wak den prensa pero un notario no. Pero Katherine ke trese un kambio den esaki. Awor ku e ta na Kòrsou hende por mira ku e ta un hóben i tin bia no por kere ku e ta traha den un ofisina di notario i p’esei e intenshon ta pa den futuro kuminsá na skolnan sekundario pa konsientisá hóbennan.
Modernisá i digitalisá e sektor
I kiko ta ferwaktu di Katherine den e sektor notarial i spesífikamente na e ofisina di Alba Chatlein. E lo a bisa ku loke e ke ta modernisá i mas ainda hiba e notarial di Kòrsou den direkshon di digitalisashon. Tempu el a traha na Hulanda nan tabata basta dilanti den digitalisashon. E sa ku tur kos lo no bai den un dos tres pero e lo yuda si den e parti di tempu di espera pa un akta. Katherine ta spera ku otro hende na Hulanda ku mir’é i wak kon a bai kuné i nan tambe lo bin yuda pais. I meskos ku sra. Chatlein a bai busk’é na Hulanda kisas e tambe por bai buska hóbennan na Hulanda pa bin yuda na Kòrsou. Katherine semper kier a bin Kòrsou bèk pero e no a ferwaktu ku e lo a bai asina lihé. E ta kontentu ku Chatlein a bin te Hulanda i konvensé. “I si mi haña oportunidat pa bira notario, no solamente pa digitalisá pero tambe pa konvensé nos yunan di tera pa bin bèk”. Segun Katherine a bisa Djasabra.
