WILLEMSTAD.- APC dia 17 di sèptèmber 2020 a kumpra na findishi e parsela konosí komo “Plaza Hotèl” pa e suma di NAf 6,3 mion. “Plaza Hotèl” ta forma parti di e portafolio lokal di invershon di APC. Ya ta preparando e plannan pa desaroyá e lokalidat presioso aki di Kòrsou di un forma duradero kaminda e karakter di e Patrimonio Mundial di UNESCO ta keda salbaguardiá.

E proyekto aki ta integrá ku sentro di siudat i lo duna balor na entre otro e produkto turístiko di Kòrsou i fortifiká e eksperensia kultural di nos poblashon. Den kuadro di esaki ya pa algun tempu APC ta hibando kòmbersashonnan avansá ku Heritage Plaza Consortium ku ta konsistí di ekspertonan di propiedatnan inmóbil (Real Estate), señor. Ab van der Wiel ganadó di e premio di e proyekto di fábrika di ariña na Leiden, Realconomy Group di Rotterdam i e konosido Hans de Boer eks presidente di VNO-NCW kende ta masha envolví ku Kòrsou.

E ambishon i e espektativanan ta haltu. E proyekto lo wòrdu desaroyá ku envolvimentu di mas tantu ekspertisio lokal ku ta posibel.

Algemeen Pensioenfonds van Curaçao (APC) ta bon konosí komo e fondo di penshun di ámtenarnan i personal semi gubernamental i ta eksistí ya pa 83 aña kaba.

APC ta hiba un maneho di invershon sólido i prudente pa asina garantisá e penshunnan di su partisipantenan. APC den su maneho di invershon ta pone énfasis riba rentabilidat, likides, solvabilidat i repartishon di riesgo i den konkordansia ku e kresementu di e obligashonnan di e fondo.

E pandemia di COVID-19 ta siña nos ainda mas ku diversifikashon i diferensiashon den e portafolio di invershon ta esensial.

E interes stratégiko di e invershonnan lokal ta sintá den e faktor di un rendimentu relativamente konstante. APC ta hiba un maneho di invershon transparente i e relatonan anual di e fondo ta optenibel pa públiko riba su wèpsait.

APC huntu ku su partnernan nobo, ta bai pa konkretisashon di e reto nobo aki di un forma eksitoso pa APC, e invershonista i pa Kòrsou. APC tin konfiansa den futuro.

LAGA UN KOMENTARIO

Please enter your comment!
Please enter your name here