E di 14 edishon di “World Clean Up Day” ta e wikènt akí; Dirigí pa outomobilistanan
WILLEMSTAD.- Djabièrnè 18 di sèptèmber i djasabra 19 di sèptèmber, ku ta e Dia Mundial di Limpiesa, (‘World Clean Up Day’) mas ku 2 mil boluntario lokal, den diferente área rònt Kòrsou ta hasiendo trabou di limpiesa for di 7or pa 11or di mainta. Un akshon di limpiesa ku ta tuma lugá pareu ku 200 otro pais mas rònt mundu.
Preparashon pa e akshon boluntario mas grandi na mundu akí ta yegando su kulminashon. Kuminsamentu di siman koordinadónan di áreanan a risibí e delaster detayenan i mayoria lider di grupo/partisipante a risibí nan pakete pa e trabounan di limpiesa.
Outomobilista paga tinu!
Curaçao Clean Up ta rekordá tur outomobilista pa tene kuenta ku tantu djabièrnè komo djasabra awor tin boluntario na diferente parti di Kòrsou ta hasiendo trabou di limpiesa.
Por fabor baha e velosidat den e áreanan kaminda tin trabounan di limpiesa ta tumando lugá. Lo tin e indikashonnan nesesario unda tin trabounan ta tuma lugá i tambe lo tin boluntario ku chaleko oraño bistí.
Un rekordatorio pa boluntarionan:
Kome bon promé sali kas, bisti kómodo, usa krema kontra solo, bisti pèchi i bebe hopi awa durante e mainta (kada 20 minüt). Rode Kruis tambe ta pendiente pa kualke urgensia.
Curaçao Clean Up TA GRADISI TUR BOLUNTARIO, SPÒNSOR i PRENSA ku ta partisipá na e akshon di limpiesa nashonal akí i ku tur aña ta kooperá pa hasi e akshon mas grandi di limpiesa di nos isla un éksito. I mesora tambe ta hasi e evento di limpiesa mundial akí un evento sosial.
Nos tur ta komprendé importansia di un isla limpi ku ta bon pa nos mes salú, pero tambe pa progreso di nos pais.
