Juliette Jansen

 

Juliette (Jullie) Jansen a nase ku e un problema di su múskulonan. Esaki a trese kuné, ku Jullie ta limitá i no por kana. E por move su pianan si pero no tin e forsa den su múskulonan pa por para riba nan. E limitashon aki sinembargo no a evitá ku Jullie no ta realisá su soñonan. I un di su soñonan tabata pa bula ku parashut/Skydive ku el a realisá dia 1 di yanüari último. E ta hiba un bida normal, apesar di su limitashonnan i ta traha na Seawings NV pa 12 aña kaba.

 

Nada ta imposibel….

Nada den bida mester ta un estorbo pa nos. Tur loke nos ke nos por. Den entrevista ku Djasabra, Jullie  a papia i konta nos di su hazaña den haltu i ku esaki e kier ta e ehèmpel pa tur hende, no solamente esun ku tin un limitashon. Si bo tin un soño bai pe! Juliette Jansen a konta nos ku el a nase asina aki. Ta un problema ku a originá den su lomba ku ta afektá su múskulonan ku ta pone ku e no por kana. Su kurpa i pianan no tin forsa pa lant’é pa e por kana. Esei ta Jullie su limitashon. El a bishita skol spesial i einan el a keda te ku 21 aña. Na e skol nan a yud’é pa e por a bai diferente stazje i despues ora el a kaba, e por haña un trabou.

 

Den e enseñansa spesial el a haña estudionan na su nivel.  El a pasa esaki den grupo i kada hende ta haña les na su nivel. E sistema aki no tabata difísil pa Jullie. El a lanta den un famia ku a sali kuné i nunka a skondé, pasobra e ta diferente di otro muchanan. Semper el a bai tur kaminda, su mama i tata ta sali kuné i asina el a desaroyá un mentalidat ku pa e sinti su meskos ku tur otro hende. Jullie no ta sintié ménos apesar di e limitashon ku e tin.

 

Segun tempu tabata pasa e mester a bai traha. El a manda diferente karta di solisitut pero debí na su limitashon e no por a haña trabou. E ta kere ku komo e lugánan mester a hasi adaptashonnan ku ta kostanan p’esei nan a preferá na no dun’é trabou apesar ku e tin di estudio pa esei.

 

Seawings a adaptá pa Jullie por traha….

El a logra na Seawings. Den kombersashon ku su doño di trabou ku ta ulandes, e tabata ke un persona ku desabilidat den su kompania. A splika Jullie tur loke mester a wòrdu hasi na e edifisio promé e kuminsá traha. Un dia Jullie a bai e kompania Seawings  i nan a kana rònt i wak tur loke mester keda adaptá promé ku e por a kuminsá traha. Ora tur kos tabata kla el a kuminsá traha i awe e tin 12 aña na Seawings. Jullie mes ta hasi tur kos i e koleganan ta yud’é ora e pidi pa yudansa.

 

Hòbi ta landa….

Jullie su hòbi ta landa i e por landa tambe apesar di su limitashon, Den awa bo ta bira fofo i bo tin mas mobilidat den laman. Lamentablemente segun Jullie, aktualmente e fasilidatnan pa hendenan ku limitashon por drenta laman na Kòrsou ta masha limitá. Esaki tambe a pone ku e no ta bai laman asina tantu mas. Jullie tambe ta stür outo, un vehíkulo adaptá ku brek i gasolin na man.

 

Hopi a drecha pero falta mas…..

Komparando Kòrsou di 10 aña pasa i awor, for di e punto di bista di un persona ku desabilidat, Jullie a splika Djasabra ku Kòrsou a bai dilanti. Awe Kòrsou ta mas delantá. E ta mira diferente negoshi i kompanianan ku ta teniendo kuenta ku personanan ku limitashon den lugánan di parker mas hanchu. Ounke tin bia tin hende ku no tin un desabilidat i no ta respetá e lugánan di parker ei. El a yega di bishita lugánan kaminda e mester a kore drei rònt basta ratu promé e por a haña un lugá di parker ku ta spesial pa un persona ku desabilidat.

 

E dia a yega…

Dia 1 di yanüari último Jullie su soño a bira realidat, el a bula den parashüt. El a splika nos ku Skydiving a bira awor un di su hòbinan. El a sera konosí ku Skydiving via un programa na radio. E sa ku no tabatin e posibilidat ei na Kòrsou i despues su amiga ku tambe ku miedu di haltura a bisé ku e ke bai hasié i a invit’é. E prèt ta ku e amiga ku su miedu pa haltura i Jullie ku su limitashon tabata un pakete pa bai hasi e Skydiving. Su amiga tabatin kontakto ku Skydive Curacao i a pone e kontakto i splika nan di Jullie. Jullie a bai pa hasi un evaluashon pasobra tabata algu ku e kier a hasi. Nan a hasi un evaluashon i a splik’é tur kos di e Skydiving. Jullie a splika su kondishon i e organisashon di Skydive a hiba e plan den otro pa Jullie por a bula den parashüt. Niun ratu so, segun Jullie e no a pensa mes ku no por i dikon no por. E adaptashonnan a sosodé i dia 1 di yanüari e bulamentu a tuma lugá. Jullie a bula di hak na e instruktor su tras. E mester a bai un dia mas tempran i a pasa tur loke mester sosodé den laira den e avion pero na tera. A trein tur kos pa ora ta den laira tur kos bai bon. Nan a bisti un harnas i den e harnas ei nan a mare bon mara na kurpa di e instruktor. Ora nan tabata saliendo for di e avion, ya Jullie tabata kologá eifó kaba. I e instruktor ainda tabata sinta den e avion. El a keda splika ku ora yega abou na suela, e instruktor su pia mester mishi ku suela promé ku di dje. I den kaso di Jullie nan a mara su pianan pa nan keda huntu komo ku  no tin kòntròl riba su pianan. I asina ora e bula su pianan no keda zuai i a pone un hak ku ta tene su pianan huntu i den laira a hak esaki i den laira a strek e, i asina e tabata den posishon sinta. Ora nan a yega abou e instruktor su pia ta toka suela i abou dos Catcher ta fangu Jullie ora el a yega abou i asina wanta su pianan pa el a baha sinta. Tur esaki a bai fásil fásil.

 

Muchu mas di loke mi a ferwaktu….

“MI kier a yama nan danki pasobra tabata un eksperensia úniko. Ta algu fantástiko i mi ta rekomendá tur hende pasobra si ami por bo tambe lo por. Hasié maske ta un bia den bida”. I despues ku Jullie a pasa dor di e eksperensia aki, e por bisa ku no tabata loke el a fèrwaktu. E tabata muchu mas di loke el a ferwaktu, asina el a bisa Djasabra. “E sensashon ku bo ta sinti ora bo ta zueif den laira, aki bou bo no ta sintié. Ta un trankilidat i bientu ta waya den bo oreanan.

No deskurashá….

I loke Jullie por bisa na otronan ta “un konseho pa tur hende i no pa hende limitá so, nos a bin na mundu pa biba un bida felis i kontentu, hasiendo loke nos ta gusta i no pa hende pero hasié pa bo ta kontentu. Ora mi a bula mi no a bisa mi mayornan i niun hende, mi a bai skondí bai bula i ta e dia ku e kos a kaba di sosodé mi a bisa nan. Mi no tabata ke pa niun hende deskurashami. I esei mi ke bisa, si bo ta gusta algu i bo ke hasié, hasié, no laga bo limitashon i no laga hende deskurashabu di loke bo ke hasi. Bo tei awe i mayan bo no sa”.

 

“I mi tin hopi mas den mi kabes i si no tabata pa mi situashon finansiero, lo mi paga pa mi bula atrobe. Tin hopi mas pa bin. E skydive tabata un kos ku mi kier  hasi pero tin mas pa bin.” Jullie a terminá.

 

 

 

LAGA UN KOMENTARIO

Please enter your comment!
Please enter your name here