Fundashon Mangusa mas di 50 aña di eksistensia
Ken no ta kòrda Bea Muzo na Banda Bou? Un persona bon konosí den e bario aki, ku a dediká su mes na yuda hóbennan, mamanan soltero i a trese yen aktividat. Fundashon Mangusa ta eksistí mas di 50 aña kaba, kuminsá ku Bea, awor su yu muhé Jahaira i tambe esun mas hóben Surviennely Sirvanie ta kontinuá ku e fundashon. Jahaira a konta kiko tur nan ta hasiendo i a hasi kaba na e fundashon i kon ta bai sigui.
Di baile pa edukashon
Fundashon Mangusa a kuminsá for di aña 1971 miéntras Jahaira mes a nase na 1972 konsekuentemente el a lanta den e fundashon ku su mama Bea Muzo na kabes. E fundashon a kuminsá komo grupo di baile pero su mama a topa hóbennan ku nunka no a bai skol. Nan no tabata “dropouts” pero simplemente no a bai skol. E asuntu di baile a bai na di dos lugá i a pone atenshon na edukashon di e hóbennan. Bea a bisa semper ku ki bal e hóben su historia, e ta baila e bailenan folklóriko ekselente pero no por lesa ni skibi. Asina e grupo di baile Mangusa a bira fundashon Mangusa na 1975 i pa traha riba e parti di edukashon pa e hóbennan.
Ki bal abo bon i esun band’i bo no
Jahaira a splika kiko a nifiká pe, lanta den un ambiente asina aki di yuda hóbennan te ku awor e mes a tuma over. El a bisa ku e kos a bai outomátikamente. Nan a partisipá komo mucha den e proyektonan. Miéntras e tabata krese e tabata haña tarea por ehèmpel pone stul ets ets. Promé tur kos tabata tuma lugá na kas mes. Mester a hala stul di sala i balkon i asina e aktividatnan tabata tuma lugá. Nan a kustumbrá ku e muchanan ku ta bini. Bea ta trahadó sosial i e mester a sali tin bia mardugá pa solushoná problema ku nan tata. I asina segun e krese el a involukrá su mes den e trabou sosial. Bea tabata bisa nan semper ku ta nan deber komo kristian pa yuda un ruman. Ki bale la pena abo ta bon i e hende banda bo no. I esei nan a lanta den kas kuné i eseinan tur ta konopá na otro den e trabou.
Falta di fondo a sòru pa problemanan di 1971 a bin bèk
Jahaira a lanta ku hóbennan i el a duna un bista kon el a mira e desaroyo aki. E desaroyo tabata bai bon pero a bolbe kambia, E tempu ei Mangusa mester a lucha pa rekonosementu di fondo i ora a hañ’e e trabou tabata bai bon. Loke e fundashon a bringa pe nan a mira bèk ku for di 2006 nan a mira eseinan bai bèk. Loke e fundashon a traha pe for di 1971 te 2003 nan a para mira bèk pa falta di fondo i sin supsidio bai bèk na loke e fundashon a topa na 1971. Esei ta lamentabel. Loke e fundashon a topa ku ta insesto na 1971 no a bin bèk pero loke ta “dropouts”, mama hóben soltero, faltamentu di skol, e parti di mayornan sin trabou, violensia na kas, muchanan deskuidá nan no tin e parti ei mas den e fundashon pa duna guia na e kasnan. Nan tin SOAW pa yuda pero e manera ku fundashon Mangusa tabata funshoná di bai kas, traha konstante sin orario a baha hopi. Ántes asina mayor òf bisiña señalá algu nan ta bai mesora. No tabata un sistema ku via un kaso tin di bai pa kana su kaminda pa nan atendé. Hopi kas nan tin di yuda òf mira pasa bai pasobra e ta tuma tempu pa solushoná.
Hopi fundashon ménos supsidio
Fondo a bira hopi difísil segun Jahaira pasobra tin muchu mas fundashon. Hopi bia nan ta tende ku tin di parti e sèn pa tur fundashon haña un tiki i p’esei e fondonan a bira ménos i ménos i asina e aktividatnan serka nan tambe a bira ménos. Hopi bia e profeshonal ku tin di toka un tema tin di bin di pariba i tin di paga nan. I esei ta komprendibel pasobra na ta bin di leu. Hopi bia mester laga e hende bai pasobra no por paga e tarifa ku nan ta pidi i esei ta hasi e aktividatnan difísil. Fundashon Mangusa ta haña supsidio di Reda Sosial loke ta sosodé for di 2016. Pero nan tambe tin e difísil i ta kòrta tur aña. Nana rekoudashon di fondonan ta mas bien pa mantenshon di edifisio i paga loke e supsidio no ta paga.
Estímulo pa sigui
Fundashon Mangusa tin derechi di eksistensia segun Jahaira. Ora e topa hóbennan, mayornan, welanan bèk i mira kon eksitoso nan ta na Kòrsou i otro pais i tambe boluntarionan ku nan mester a laga bai, nan tin derechi di eksistensia. E ta kòrda un mama ku un tempu komo hóben a bin serka nan, a bai Ulanda òf ta sigui studia aki mes. E ta un estímulo pa sigui yuda hóbennan.
Di hóben pa hóben
Survienelly Servanie ta un hóben ku aktualmente tambe ta dirigí otro hóbennan den fundashon Mangusa. Vienny a lanta den e fundashon i su mama tambe ta un boluntario di e fundashon. El a splika ku el a kuminsá 15 aña pasá komo hóben partisipando den proyektonan. E tempu ei ku muchu mas hóben pero tabata dushi eksperensia i amplia konosementu general. Ta keda ku un siñansa pa futuro. Na e fundashon nan ta sòru pa e hóben su formashon sosial, general, amplia nan konosementu manera últimamente nan tema ta historia. Entre otro e aña aki selebrashon di 160 aña abolishon di sklabitut. Nan tabatin algun luna pasá un obra skibí pa tio Ali i tambe algun hóben nan mes a traha nan mes koreografia. Vienny a bisa ku su mishon den bida ta traha ku hende. El a traha ku hende hèndikèp, el a traha ku esnan ku no por komuniká i esnan ku por komuniká. El a kore stazje den edukashon di hende ku desabilidat. E tin satisfakshon pa traha ku hende.
Motivá e hóben
Vienny ta sinta falta di edukashon di e hóben, e motivashon, laga nan mira kos di futuro. Komo hóben tin bai bo no ta wak ku bo tin di hasi bo bèst pa futuro. Enfoká bo edukashon pa mañan bo gosa di dje. Esei Vienny ta sinti falta di dje esta motivá e hóbennan pa nan tin gana di bai dilanti. I pa e mayornan, e ta kere ku nan tin pone mas esfuerso, motivá e hóben. Tin bia e mayor no a konosé esei p’esei e no por hasié ku su yunan tampoko.
Buska e hóben
I ke trabounan ku nan ta hasi ku hóbennan Jahaira a splika ku nan no ta konsiderá nan mes un “Opvang”. Na un “opvang” e mucha ta liber pa bai i keda i ‘opvang”. Dia e mama manda karta bisa e yu no ta bai e no ta bai. Pero den nan kaso si e hóben bisa e no ta bin nan ta drenta outo i bai busk’e. Nan ta traha ku skol, kas i mayor. Nan ta traha ku hóbennan di Bándabou. Hopi bia nan ta aserka e hóbennan. Nan ta tuma kontakto semper ku mayor i tambe via skol tin kontakto.
Fondo pa dirigí riba mayornan
Jahaira ta spera ku nan por haña mas na supsidio pa asina intensivá e trabounan di Fundashon Mangusa, dirigí riba hóbennan. El a menshoná ku nan ta komuniká via app ku mayornan pero ántes tabatin proyektonan ku ta kana paralelo ku e hóben,. Si bo no bai kas loke siña e hóben serka nan ta bai pèrdí pasobra no tin sosten di e mayor, Awor ta via app ta sigui komuniká pa e mayor sa kiko nan ta hasiendo. Ta mihó tin fondo pa nan hasi e parti ku mayornan tambe. I pa e organisashon ku ke yuda nan semper ta bon bini. Nan ta riba FB fundashon Mangusa kaminda nan ta pone tur nan aktividatnan. Jahaira ta gradesí na personanan di otro organisashonnan ku semper ta dispuesto na yuda nan.
Ban komuniká
Aktualmente manera el a bisa, nan ta besig ku e proyekto di Ban Komuniká ku hóbennan entre 13 i 18 aña ku ta bayendo skol avansá. E proyekto a kuminsá na 2016 ora nan a nota ku hopi bia e hóbennan no por ekspresá nan mes òf si nan hasié no ta na e manera adekuá. Despues di señal’é a kuminsá ku e proyekto. E ta konta na kas, skol i komunidat. Tin bia e hóben tin rason pero e no sa kon trese dilanti loke e tin rason di dje. I p’esei a kuminsá ku e proyekto.
Museo
E proyekto di fundashon Mangusa a bai asina leu te nan tin awor un museo ku artefaktonan di ántes, E museo ta habrí pa tur hende por bishitá i asta turistanan ta haña nan kaminda pa e museo di fundashon Mangusa. Vienny mes ta guia di e museo. I un persona klave di e fundashon ta Gerda Gosepa ku a lanta ku e fundashon.
