App pa warda tur dokumento

Den koperashon estrecho ku REM advocaten, Russel Martis tin un app (aplikashon) den fase di prueba ku el a diseñá pa warda tur dokumentu personal di forma digital den un “smart phone”. Di sédula i pasport te ku suskripshonnan i kontratonan andando. Di e manera aki e usadó tin tur su dokumentonan importante huntu kuné tur ora di forma digital i no mester di ta “online” kontinuamente.  Esta, tur dokumento ta keda den e app riba su “smart phone” di forma de-sentral.

 

Aplikashon nobo….

Den entrevista ku Djasabra, sr. Russel Martis ku ta abogado tambe a konta algu mas di e aplikashon ku e ta trahando ariba.  E idea a lanta di e forma aki “un dia mi tabata den un supermerkado i mi a duna mi karchi pero e pago no a pasa. A resultá ku e karchi a vense i banko a manda e karchi pa mi, pero nunka e karchi parse no a yega. Mi a pensa ku mi tin hopi di e karchinan aki, no di banko so pero tambe SVB, karchi di krédito, sédula, pasport i yen di dokumento  ku mi tin di ‘hou nan bij’. I kua manera lo mi por a hasié mas mihó pasobra ta basta un par di karchi i tin hende ku muchu mas. Mi a pensa riba un aplikashon kaminda asina mi haña un karchi nobo mi ta hink’é den e aplikashon, su fecha ku el a kuminsá kana i tur kos ta bai outomátikamente. Tambe ki dia e ta vense, kuantu ta kosta pa renob’é i kiko mi tin di hasi pa renob’é. Tur den un solo aplikashon einan”, sr. Martis a bisa nos.

I esaki el a bisa no ta konta solamente pa karchi pero pa sédula, pasaporte pero tambe pa kontratonan, suskripshonnan. Tin bia e kosnan ei ta kaduká sin ku e hende sa òf tin bia bo no ke e kontrato òf suskripshon mas bo tin di vensé un luna delantá. P’esei el a pensa di bin ku algu digital i tur kos personal ta bai den e aplikashon ei i ta keda ei den. E ta wòrdu sigurá.

 

Atvertensia pa tur dokumento….

No tur hende por drenta den e App ei i asta segun señor Martis, e kende por hink’é den su i-cloud i ta mar’é ku kalènder. Asina ora unu di e karchinan ei ta bai kaduká, bo ta haña un atvertensia i asina bo ta kuminsá hasi trámitenan. Imaginá bu bo tin di bai hasi un biahe i ta resultá ku pasaporte a kaduká. Tur esaki e aplikashon por hasi, esta kòrda e hende ku tal i tal dokumento ta bai vense i pa asina por aktua mesora.  E aplikashon ei tambe ta duna e posibilidat pa e hende por haña un resúmen di tur e dokumentonan ku den e aña ei ta bai kaduká i tambe un ‘melding’ ku e dokumento spesífiko ta bai kaduká pa asina por hasi trámitenan delantá.

 

Basta leu…

Pa yega na un aplikashon asina no ta bai fásil. Russel Martis a bisa ku e tin tur kos skibí, i a laga un kompania na Ulanda traha un oferta i awor e ta bezig ta konstruyendo e aplikashon. E mes ta bezig ta tèst esaki kaba. E tin un vershon pa iPhone i unu pa Androide. E ta tèst esaki ku tur e vershonnan pa mira di e por kumpli ku nan. E ta basta leu ku e aplikashon aki.

 

Hopi amplio….

Loke a pone sr. Martis sali na publisidat ku e aplikashon aki ta ora el a tuma nota den prensa di ku kompanianan di aseguro ta bezig ku prueba di seguro tambe online. Ku e sistema di QR-kode mas dokumento por keda wardá den e app, pero e QR-kode no ta tur ora nesesario. Un “scan” komun i koriente di e dokumento mes ta sufisiente. Esun di seguronan ta trata di un dokumento, pero esun di dje ta akapará tur dokumento, esta hopi mas amplio.

 

Remplasá….

Russel Martis a pone énfasis ku e dokumentonan den e aplikashon no ta remplasá e dokumento original. E hende ta keda gewon ku su sédula pero djis imaginá bo pèrdè bo pòtmòni i bo pèrdè tur kos den dje. I si tur kos ta den e aplikashon, bo tin nan a lo ménos einan. Tin un appnan riba merkado mundial ku ta warda entre otro tarheta di biahe, karchi di konsierto, pero nan no ta atraktivo pa tur hende pasobra e usadó, si e ke hasi uso kompleto di e app, ta hañ’é ta baha mas app di kompanianan ku ta afiliá na organisashon tras di e appnan, anto e no tin kontròl riba kiko ta sosodé ku tur su data riba su “smart phone”.

Aplikashon mundial….

E aplikashon ta hopi sigur i no ta fásil pa yega na dje.  E informashon por keda eksportá pa e sistema di cloude. Pero esaki ta keda na eskoho di e usuario mes.   E app aki lo bira algu mundial i lo keda publiká den 5 idioma segun sr. Martis. Intenshon finalmente ta pa tur hende rònt mundu por usa e aplikashon aki. I p’esei e ta kuminsá ku 5 idioma i lo wak su éksito pa asina sigui ampli’é ku mas idioma.

 

Pronto….

E app di ta keda lansá pronto. Despues di e periodo di prueba por bah’é for di Apple store i Google Play store na un preis atraktivo sin “in-purchase” i sin propaganda, esta sin gastunan èkstra i skondí. Ta un proyekto nashonal ku aspirashon mundial.

 

SHARE

LEAVE A REPLY