WILLEMSTAD.- Aqualectra ta anunsiá ku pa mañan djasabra 15 ougùstùs, nan lo por bini ku un posibel skema di “schakel”. Ya pa algun siman kaba, Aqualectra ta monitoreá e situashon di koriente na Kòrsou èkstra di aserka. Temporada di kalor a kuminsá mas tempran ku kustumber, tin hopi fluktuashon den kondishonnan di bientu i tin algun mashin ku ta for di servisio sea pa reparashon òf pa mantenshon ku a kai for di e skema di mantenshon regular. Apesar di e situashon akí, Aqualectra ta bisa di a logra mantené suministro kontinuo na komunidat riba mayoria dia kombinando mashinnan ku ta den produkshon, mulinanan di bientu i energia ku ta keda almasená den e baterianan di e kompania.
Lamentablemente mañan, djasabra 15 di ougùstùs, pronóstiko ta mustra ku bientu lo bai baha supstansialmente for di oranan tempran di dia. Lokual ta pone ku Aqualectra ta bai pèrdè kapasidat di produkshon via di e mulinanan di bientu i lo mester hasi uso di e baterianan for di tempran pa por mantené e suministro na siudadanonan. Aqualectra a traha henter un skema, kaminda ta parti e barionan den orario ku nan lo por pèrdè koriente.
