WILLEMSTAD.- Segun skema di trabou, na òktober Aqualectra tin koriente stabil garantisá, paso tur problema di mashin ta solushoná.
“Loke nos tin na e momentunan akí, ta un problema di “firm capacity”. E bientu te ainda a bin ta yuda nos pero tin biaha lástimamente ora wer ta malu fuentenan di energia renovabel ta laga nos na kaya”.
CTO di Integrated Utility Holding (IUH), sr Rudolf Garmes a splika detayadamente dikon nos no tin e kapasidat tur dia pa por kumpli ku demanda di koriente durante e periodo akí. Nos kapasidat firme (“firm capacity”) ta nos plantanan di mashin di disel; esei ta e kapasidat ku sigur bo mester por konta kuné. Na e momentunan akí, Aqualectra tin kuater mashin di disel for di sirkulashon kual ta afektá loke ku tin na kapasidat pa kumpli ku e demanda di koriente. Si tur mashin di disel ta operashonal, Aqualectra tin aworakí un total di 150 MW ku kua nos por kumpli ku demanda kompletu di isla ku ta 140 MW. Sinembargo, kuater mashin for di sirkulashon ta nifiká ku nos tin falta di 40 MW na “firm capacity” kual nos lo mester kubri ku energia renovabel e dianan akí. Pero bientu no ta un faktor stabil. Ora bientu kai, Aqualectra no por kumpli ku e demanda di koriente i mester pasa na ‘schakel’.
Kiko a pasa: Sr. Rudolf Garmes a kuminsá splika ku e problema a kuminsá despues di mantenshon intensivo di nos mashinnan di produkshon kaminda a hasi ehersisio pa kambia e tipo di kombustibel ku e mashinnan ta usa pa subi efisiensia. Un mashin, sin duna ningun señal, a kibra den desèmber 2025, algun luna despues di e mantenshon akí. Despues di investigashon, a resultá ku Aqualectra no tabata tin falta di nada i seguro a paga Aqualectra p’e daño. Pero e mesun piesa ta den tur e otro 7 unidatnan di disel. Na momentu ku un mashin mas a kibra na aprel di e aña aki, nos a haña e indikashon ku e mesun piesa lo por kousa problema den e otro mashinnan. Despues di aprel, nos a ripará ku dos otro mashin tambe tabata mustra di bai haña e mesun problema. Nos a saka nan for di produkshon pa nan no kore e mesun suerte ku e promé mashin. Sr Garmes a bisa ku e promé mashin ta wardando motor-blok nobo ku ta planeá pa yega sèptèmber. Por a drecha e di dos mashin ku e piesanan ku ya a yega. Pa e otro dos mashinnan tin mekánikonan di 4 tim internashonal diferente na Kòrsou hasiendo reparashon i mantenshon. E plan ta ku, pa òktober próksimo, tur mashin ku ta for di sirkulashon lo ta bèk den sirkulashon. Pero ainda no ta kla. Sr Garmes a bisa ku e situashon aki a pone ku no por a kuminsá ku mantenshon planiá di e otro sèt di mashin di disel ku tabata na bùrt pa haña mantenshon. Pa òktober lo ta kla ku mantenshon di esakinan tambe i na e momentu ei Aqualectra ta konta atrobe ku su kapasidat kompletu i stabil di mashinnan di produkshon.
