WILLEMSTAD.- Entrante awe djamars 3 di febrüari Aqualectra ta kuminsá ofisialmente ku instalashon di Prepago Inteligente serka klientenan ku te awor ta hasiendo uzo di e sistema di Pagatinu pa tin mihó bista i maneho riba nan uso di koriente.
Pa un tempu kaba, Aqualectra ta kanando e trayekto pa kambia tur meter konvenshonal di awa i koriente pa un meter inteligente. Ku desaroyo di teknologianan mundialmente, ta nesesario pa Aqualectra tambe sigui desaroyá su produkto i servisionan pa por keda brinda kada kliente konfiabilidat i kalidat awor i den futuro. Na 2025 Aqualectra ya a kambia kasi tur meter di awa rònt Kòrsou pa un meter inteligente i mas di 30.000 meter di koriente. Tabatin tambe klientenan ku ya a risibí un Prepago Inteligente na aña 2025. Den e kaso akí, ta trata prinsipalmente klientenan ku a eksperensiá kualke interupshon ku nan Sistema di Pagatinu.
Intenshon ta ku e Sistema di Pagatinu ta bai stòp di eksistí i tur kliente prepago ta pasa pa Prepago Inteligente.
Ku e Prepago Inteligente, e kliente ta keda ku mesun kontrol i maneho di su gastu i uso di koriente manera ta e kaso awor akí ku e Sistema di Pagatinu, pero na un manera muchu mas fásil, efisiente i moderno.
Un di e diferensianan di mas grandi entre e Sistema di Pagatinu i e Prepago Inteligente ta, ku e kliente no mester hinka un seri di 10 sifra mas pa rekargá su kuenta. E por rekargá su Prepago Inteligente na kualke punto di benta di Pagafasil sin mester yega te kas pa hinka un kódigo pa rekargá.
Un otro kambio grandi ta ku Prepago Inteligente ya no ta bai tin un aparato físiko na kas òf negoshi di e kliente; riba su telefòn selular e kliente tin bista na tur momento riba su uso di koriente. Na momentu ku e saldo di koriente ta abou, e kliente ta risibí un SMS òf email komo notifikashon.
Poko poko tur kliente ku awor akí tin e Sistema di Pagatinu lo mester pasa pa Prepago Inteligente. Klientenan ku a eksperensiá un interupshon ku nan Sistema di Pagatinu, ta risibí outomátikamente nan Prepago Inteligente i tur instrukshon kon pa traha ku esaki. Pa esnan ku no tin un interupshon pero ku ke traha un sita pa Aqualectra por hasi e kambio, lo tin un kalendario disponibel online entrante 2 di febrüari via aqualectra.com/meterinteligente/sita.
Riba e plataforma akí, kada kliente mes por skohe e fecha i e orario ku mas ta kumbiní pa Aqualectra por pasa hasi e kambio di meter. Aparte di e kambio di Pagatinu pa Prepago Inteligente, Aqualectra ta sigui tambe ku kambio di meternan postpago/ konvenshonal ku ta instalá paden di kurá òf den kas; pues pa esaki tambe por traha un sita via e plataforma online.
Kambio di meter, sea konvenshonal òf Pagatinu, ta sosodé segun área. Via di korant, retnan sosial i wèpsait di Aqualectra, kada kliente por wak den ki temporada su área ta na turno pa e por traha su sita den e temporada ei riba e fecha i orario ku mas ta kumbinié.
Henter e proseso for di yegada di e tékniko te na momentu ku bo meter ta instalá, ta dura mas o ménos 45 minüt total i e kambio di meter ta tuma lugá sin kosto pa e kliente. Un sita ta posibel tambe via di Aqualectra su Sentro di Kliente na 0800-0135. E trayekto pa kambio di meternan di koriente konvenshonal pa un meter inteligente tambe ta parti di Aqualectra su promesa pa brinda nos komunidat produkto i servisionan konfiabel, pagabel i duradero ku fundamentalmente ta sirbi bienestar di kada kas na Kòrsou.
