WILLEMSTAD.- Ayera tra’i mèrdia wes komisario a prolongá detenshon di e pelotero Jonathan S. ku 60 dia. Huntu ku e pelotero tambe a prolongá detenshon di tres sospechoso mas ku 60 dia, miéntras e hende muhé ku tabata detené, su detenshon a keda di skòrs.
Dia 29 di yanüari último a detené e pelotero Jonathan i 8 persona mas. Durante redada a konfiská vários arma di kandela, munishon, patronchi i lachi. Siman pasá djabièrnè a prolongá detenshon di Jonathan S. ku 8 dia mas, i awe e pelotero i e otro sospechosonan detené dia 29 di yanüari mester a bolbe presentá dilanti di wes komisario. Nan detenshon preventivo a keda prolongá ku 60 dia. Na momentu ku yega 60 dia di detenshon, esaki ta nifiká ku probablemente e sospechoso (nan) lo tin di presentá dilanti di un wes den sala di korte, pa responsabilisá nan mes p’e akusashon ku tin kontra di nan.
Detenshon di e pelotero Jonathan i su amigunan ta bini despues di a sali festival di tumba djaweps den trempan di mardugá. Tabatin indikashon ku pa algun tempu kaba, outoridatnan polisial lo tabata sigui pasonan di Jonathan i su grupo ku a keda arestá i un otro grupo mas. Pues, ta trata di dos gèn kontra di otro.
Siman pasá djabièrnè wes komisario a prolongá detenshon di Jonathan i sinku sospechoso mas. I ayera ta kuater di nan su detenshon a keda prolongá ku 60 dia, inkluyendo e pelotero tambe.
