SALT LAKE CITY, AP.- E aresto di personanan sospechoso di residensiá sin outorisashon den Merka a oumentá ku 24% desde ku Donald Trump asumí presidensia di e estado.
E sifranan publiká siman pasá pa e agensia di Inmigrashon i duana ICE ta revelá oumentonan den aresto i deportashon pa e ofisina di Salt Lake City, kual ta inkluí e estadonan Idaho, Montana, Nevada i Utah, segun informashon di e diario The Salt Lake Tribune.
E personanan arestá durante e aña fiskal di 2018 a suma 5.754, kompará ku 4.638 na 2016, segun e informe ofisial. Outoridat a deportá 3.408 persona, kasi dòbel di e 1.731 personanan na 2016, promé ku Trump a asumí.
E agensia a bisa den un informe ku “e kongurensia ku e dekretonan di presidente Trump, emití na komienso di 2017, a usa e rekursonan ku tur efikasia i efisiensia posibel pa apliká leinan di inmigrashon di e nashon”.
ICE a arestá 158.851 den e pais kompleto e aña ei, un oumento di 44% kompará ku e 110.104 arestonan di 2016. E agensia a deportá 256.085 inmigrante, 6,5% mas ku na 2016.
10% di e sifra nashonal no tabatin antesedente kriminal, 66% a haña kondenanan kriminal, 21% tabatin akusashonnan pendiente i 3% tabatin òrdu di deportashon.
