BUENOS AIRES, ARGENTINA, AFP.- Argentina lo bira e promé pais di Latinoamérika ku ta produsí e vakuna Sputnik V kontra COVID-19, segun anunsio di fondo soberano di invershon di Federashon Ruso for di Moscow despues di un akuerdo ku e laboratorio argentino Richmond.
Fondo di Invershon Direkto Ruso (RDIF) i su sosionan a “fasilitá transferensia di teknologia pa Laboratorio Richmond” di Argentina, segun indikashon di un komunikado. Produkshon na gran eskala lo kuminsá den yüni.
Kirill Dmitriev, direktor ehekutivo di RDIF a bisa ku a aprobá e vakuna den mas di 10 pais den Latinoamérika i Sentroamerika, i “produkshon den Argentina lo yuda fasilitá entreganan na otro sosionan den region”.
E empresa privá den e pais ya a produsí 21.000 vakuna kaba i hiba esaki Sentro Gamelya hasi un kontròl di kalidat. Esaki ta e instituto ruso di investigashon di epidemiologia i microbiologia.
Presidente di Laboratorio Richmond, Marcelo Figeuras a selebrá “rekonosementu” di e empresa a base di su “plataforma sientífiko i tékniko”. Presidente Alberto Fernandez a bisa ku e akuerdo ta “un gran oportunidat pa avansá ku e lucha kontra e pandemia no solamente den Argentina pero den Latinoamérika tambe”.
