BUENOS AIRES, AP.- Tres funshonario di Armada argentino a wòrdu kulpá ku e tragedia di supmarino ARA San Juan dos aña pasá den sùit di Atlántiko.
E kapitannan Jorge Andres Sulia, Hugo Miguel Correa i Hector Anibal Alonso mester deklará dilanti di hues federal Marta Yañez entre djamars 22 i djaweps 24 di òktober, segun e resolushon firmá pa e hues.
E tres personanan aki tabatin diferente grado di responsabilidat riba 15 di novèmber 2017, temporada ku ARA San Juan a disparsé ku 44 tripulante na bordo miéntras e tabata nabegá na su base na Mar del Plata, 400 kilometer na sùit di Buenos Aires, i despues di a partisipá den un ehersisio militar. Ningun ofisial a duna komentario riba e resolushon hudisial aki.
E empresa merikano Ocean Infinity, kontratá pa e gobièrnu argentino, a haña e supmarino un aña despues di su desaparishon, 907 meter bou di awa i 600 kilometer na ost di e haf argentino Comodoro Rivadavia, serka di e zona kaminda e supmarino a tuma kontakto pa haña yudansa e promé biaha. No tin sobrebibiente.
