TUCSON, ARIZONA, MERKA, AP.- E segundo huisio di un aktivista di Arizona akusá pa duna migrantenan refugio sin outorisashon na frontera ku México lo kuminsá djaweps. Scott Warren, di 37 aña, a bisa ku el a simplemente purba duna yudansa humanitario na dos hòmber ku tabatin mester di esaki.
Ta di dos biaha ku ta demandá Warren. Sinku luna pasá hurado no por a yega na un akuerdo.
Warren a bisa ku e tin e deber humanitario pa yuda migrantenan den nesesidat. E ta voluntario pa No More Deaths, un grupo ku ta laga kònteinernan di awa den desierto. E grupo a atministrá un kampamentu pa duna atenshon médiko na migrantenan heridá tambe.
Sinembargo, outoridat a bisa ku Warren a konspirá pa yuda e migrantenan pa evadí outoridat i ku e hòmbernan no tabata den un situashon di peliger na ningun momentu. Warren a duna nan instrukshon pa evadí un punto di kontròl di Patruya na Frontera.
Warren i su partidarionan ta bisa ku presidente Donald Trump a lansa un kampaña ekstraordinario kontra gruponan humanitario ku ta operá na frontera. Warren ta un di e nuebe miembronan di No More Deaths ku a wòrdu demandá pa nan trabou, ounke e ta e úniko persona akusá ku delitonan grave.
