Presidente ruso, Vladimir Putin, na man robes durante un konferensia di prensa na Kazakhstan
ASTANA, KAZAKHSTAN, AFP.- Armenia mester realisá un referèndem riba su posibel entrada den Union Europeo mas pronto posibel, asina presidente ruso, Vladimir Putin, a bisa i tambe tres aliado mas di Rusia. Esaki ta oumentá e preshon riba Armenia, pa su relashon kresiente ku Union Europeo.
Armenia ta ofisialmente aliado di Rusia, pero den e último añanan e pais a fortalesé su relashon ku Union Europeo, pa motibu di su malkontentu ku Rusia. Segun Armenia, Rusia no a protehá e pais sufisientemente durante e konflikto ku Azerbeidjan.
Na 2024, Armenia a suspendé su kooperashon di seguridat ku Rusia. Ademas, aña pasá e pais a aprobá un lei kaminda esaki a ekspresá su intenshon pa drenta Union Europeo, kual a hasi Rusia mas furioso ainda.
Sinembargo, ainda Armenia ta miembro di Eurasian Economic Union, un union ekonómiko ku Rusia komo lider.
Putin a bisa ku Armenia mester skohe entre Union Europeo i Union Ekonómiko Euroasiátiko, i a sigurá ku no ta posibel pa e pais pertenesé na ámbos na mes momentu.
Putin a bisa ku, no ta importá kiko Armenia skohe, esaki lo no daña e relashon humanitario ni polítiko entre ámbos pais.
