PHOENIX, AP.- Investigadornan di un unidat di boluntario di ofisina di un shèrif di Arizona a deklará ku e sertifikado di nasementu di presidente Barac k Obama ta definitivamente froudulento.
Miembronan di e destakamentu di shèrif Joe Arpaio, di e kondado di maricopa, a señalá na mart ku tabatin kousa probabel kue sertifikado di nasementu di Obama publiká pa Kas Blanku na 2011 tabata un falsifikashon hasi den kòmpiuter.
Awor Arpaio ta bisa ku investigadornan ta bisa ku sigur e ta froudulento.
Mike Zullo, investigador di hefe di unidat a señalá ku e kódigonan numeriko den sierto parti di e sertifikado di nasementu ta indiká ku e partinan ei no a keda yená, no opstante e sekshonnan ku ta puntra riba rasa di e tata di Obama i su área di trabou o estudio a keda kompletá.
Zullo a bisa ku ántes e investigadornan no tabata konosé nifikashon di e kódigonan, pero esakinan a keda splika pa un eks empleado di gobièrnu di 95 aña di edat ku a firma e sertifikado di nasementu di e presidente. Zullo a indiká ku un reportero di notisia ku a yuda a permití e investigadónan pa skucha un entrevista ku e eks trahadó estatal a hasi.
