Quincy van Arneman Zimmerman
E kreatividat di nos hendenan sea na Kòrsou òf den eksterior ta keda resaltá kada bes mas. Bou di e nòmber di QVAZ, Quincy van Arneman Zimmerman ta laga mustra sea den eksposishon òf riba petishon kiko e tin aden. Djasabra a papia ku Quncy, kende ya tin basta aña , sigur for di 2013 ta biba na Ulanda i el a konta nos losiguiente;
E suich pa artista
Na 2013 el a bai studia na Ulanda den Bouwkunde HBO. Asina su karera a kuminsá ku su estudio i el a keda Ulanda. El a hasi su estudio i spesialisá den arkitektura. Esei tabata meta prinsipal pa bira arkitekto. El ta ingeniero di bouwkunde i a kuminsá ku su master i despues a bai traha. Awor aki el a suich komo artista.
Sigui ku mi soño
For di tempu Quincy tabata chikí, e tabata pinta i traha obranan di arte. Segun aña tabata bai, banda di su estudio e tabata pinta tambe i regalá famia i amistatnan. Den promé instante e tabata hasié pa e mes, algu bunita pa e tin den kas pero na 2020, e tempu ei a hañ’e ku hopi reto i a tuma su arte mas serio i kuminsá post riba media sosial. Asina el a sigui krese i el a kaba di desaroyá su arte profeshonalmente. El a kuminsá partisipá na eksposishonnan i te ku aña pasa e tabatin e oportunidat, ora no a renová su kontrakt, di skohe kiko e lo ke sigui kuné. Arkitektura ta su pashon pasobra e ta kombin’é ku su parti artístiko, pero el a disidí di sigui ku su soño,
Multi disiplinario
Hasiendo esaki el a deskubrí ku esaki ta pas kuné. El a bula den e laman i a kuminsá ku su práktika den arte i ta un kombinashon multi disiplinario pasobra e ta asesorá den e parti di bouwkunde den diseño arkitektura i visualisashon.
Hopi kreatividat
Segun Quincy, promé el a kuminsá, el a ripara ku e mester di un stap pa hasié ful, Su meta ta pa e por sòru pa su mes i su famia pa medio di talentonan. I asina Quincy a kana yega na e produkto Un Kos Bunita. Komo artista e ta traha kuadronan òf tambe algu ku e ta haña hopi rekonosibel ku nos kultura. E ta kombiná diferente estilo den su práktika. Loke ta gusta e ta hasi i for di esei e interes a krese. Hopi bia hende ta gusta un prenda i algu úniko. I kiko ta mas úniko ku bo por traha algu pa bo mes ku bo mes idea i kreatividat. Quincy a bisa e tin hopi kreatividat i asina el a traha algu pa su mes ku ta den e kaso aki Un Kos Bunita.
Nasementu di Un Kos Bunita
Un Kos Bunita ta kombiná plata, kòrta piedra presioso i kombiná ku e metal. Asina kada bes e ta keda opservá i wak e mes tabata bisa “hopi nechi, bunita” i asina e nòmber a pega Un Kos Bunita. I no ta solamente e nòmber pero ku Un Kos Bunita e ke kaptura tambe e momentu pa eksperensia pa haña algu bunita. Por ta un flor i algu ku bo ta sinti. E por ta algu pero e por ta algu ku bo ta mira, un para i tambe un persona. E no ta simplemente un manera di bisa pero e ta un sentimentu. Quincy ke ku Un Kos Bunita pa tur hende por haña algu bunita i algu ku e hende ke.
Transformashon di Abaloni
Quincy a bisa ku Un Kos Bunita ta e arte ku bo por bisti manera renchi dede., armbant, hangers i un kombinashon di diferente piesa. Últimamente el a traha un kolekshon bou di Un Kos Bunita ku diferente material ku forma di Kòrsou. I el a kombiná esaki ku un kokolishi di laman ku yama Abaloni. Quincy a sigui splika i mustra e kokolishi i dikon e ta gust’e. Bo ta haña e kokolishi di un manera den laman i e ta desaroyá den algu mas bunita. E ta manera un “hidden beauty”. E ta parse di pafó algu ku no ta remarkabel pero ta kambia bira algu otro. E ta kompar’é ku un persona ku bo no konosé i segun tempu ta bai bo ta siña konosé i su karakter bunita. I esei ta e kokolishi, kon e ta desaroyá. E material aki a lag’e kòrda riba e laman di Korsou pasobra e tin e kolonan similar. I p’esei el a kombin’é ku e forma di Kòrsou. E kolekshon aki yama “kurason” pasobra bo ta karg’e na bo kurason i tambe ku nos pais na bo kurason.
Pronto na Kòrsou
Den su práktika na kas e ta un tiki mas chiki pero e tin otro práktika kaminda e ta traha entre otro ku kandela i asina e por forma e metal. Un Kos Bunita aktualmente tin algun produkto na benta. Hopi ta keda traha riba pedido pero e intenshon ta pa Quincy por bin Kòrsou i aki tambe hasi eksposishon. E ke hasi eksposishon di nos kultura i di e arte ku bo ta bisti. Quincy a bisa nos ku si e por a bin Korsou mañan e lo hasié pero e ta trahando pa por yega nos pais pronto.
Mantené nos kultura
Hopi artista na Ulanda ku a Sali for di Korsou ta konsentrá nan obranan riba sea kultura òf kualke otro kos ku tin di aber ku Kòrsou. Quincy a bisa nos ku loke e ta hasi ta pa por keda kòrda kas. E ta un anhelo pa por ta na kas i ta buska asina sierto puntonan pa kòrda kas bek. I esei ta sea via di pintura i kosnan ku ta rekonosé ku komo bo ta den eksterior i bo wowo pasa riba dje, ta mira Korsou i memorianan ta bin bek. Ta kosnan ku otro hende tambe por rekonosé Kòrsou.
Gana bo pan
Arte semper tabata un disiplina ku bo por gana bo pan kuné. Quincy ta kere ku nos enseñansa ta ku a hasi mas un vak por ehèmpel traha algu pa dia di mama i tata i no a para ketu na e kreatividat ku nos tin komo mucha i asta komo hende grandi. Ta focus mas riba e fishinan ku mas ta pidi sea dòkter, atministrashon, finansa, pero tin e parti kreativo tambe ku ta ekspresá nos humanidat. E kreatividat ku kada un di nos tin. Si hopi hende ta hasiendo e suich ta posiblemente debí an e digitalisashon ku ta besig i hopi di nos ta buska manera pa sera konosí ku nos mes i kon mas mihó pa krea algu, algu ku ta inspirá bu.
AI no ta un menasa pa arte
Pa Quincy AI no ta un menasa pa arte. E ta komprondé ku tin hende ta pensa asina, pasobra e mes ta eksperensia kon lihé e teknologia ta desaroyá su mes, pero tòg e no ta un menasa pasobra e kreatividat i kon ta hasié, ta algu humano. AI ta usa inspirashon humano pa asina por kombiná informashon i traha algu for di dje. E inspirashon a keda úniko i no por krea rekreá.
Si bo ke bai arte, hasié
I pa nos hóbennan ku ta saliendo pa eksterior pa studia arte, e ta bisa nan pa Hasié. Un motibu dikon bo ta inspirá i gana pa hasié, hasié. Bai pe i si bo ta sinti ku na mi hasi un estudio i tin mi arte den banda tambe por hasié pasobra despues bo por disidí. Bo mester tin e dedikashon pa bo trabou, pero si bo e ke hasi arte, hasié. Den bida bo por purba hasi esaki i esaya te ora bo wowo sera.
Eksposishon
El a partisipá na diferente eksposishon. E ta kòrda ku for di kleuterschool el a yega di partisipá den su promé eksposishon. I siendo na Ulanda tambe el a partisipá na diferente eksposishon mas. Tambe el a yega di eksponé na Boneiru. E ta kòrda ku el a kaba di studia i e tabata na un eksposishon i einan el a papia ku KvK Boneiru i asina nan a invit’é na un eksposishon di arte. I despues di esei a sigui hopi mas.
Balor pa arte
Balor na arte, Quincy a bisa di loke e por opservá e ta haña esei ta kresiendo, Si wak e moveshon Kaya Kaya i tur dia e ta sera konosí ku artistanan nobo. Nos tin hendenan hopi talentoso i ta kuestion di tempu pa kuminsá balorá arte di bèrdat.
Kontakto;
Arte by QVAS
