Kora Juliana; Fleur de Marie Eatery shop

 

Arte i kultura inkorporá den Skalo/Fleur de Marie

 Kaminda kana keiru ta safe i sigur

 

Fleur de Marie i Skalo abou ta kompletamente ‘safe” pa kana, keiru i gosa di nos kultura i ambiente. Aki por topa ku diferente artista ku a establesé nan mes den Fleur de Marie, nan tin nan atalier, pero tambe diferente yu di Kòrsou ku a habri nan negoshi den Skalo Abou i Fleur de Marie. E bario aki tambe tin basta habitante ku tin basta tempu ta biba einan. I ta esaki ta loke ta hasi Skalo Abou i Fleur de Marie dushi, i ta bal un bishita!

 

Djasabra a pasa serka Kora Juliana ku huntu ku Angela Guiamo a habri un restorant Fleur de Marie Eatery Shop. Ya ta un aña kaba nan ta na Skalo Abou kaminda nan a habri un Eatery pa hendenan por bin sentro di siudat i sera konosí ku kuminda dushi, natural i alabes purba loke Kòrsou tin di ofresé. “Nos no ta un restorant komun i koriente pero nos a inkorporá arte, kultura, kosnan fresku pasobra nos ta traha ku berduranan lokal i nos ta habri Tour den e bario. Hopi hende no konosé Skalo manera e ta awor aki, i ora nos bisa nos ta na Skalo nan ta bisa ta peligroso. E persepshon ei ta bibando ainda i hopi hende tin Skalo di par di aña pasa kaminda tabatin bèrdat un área deskuidá i tabatin kosnan peligroso ta tuma lugá. Pero for di tempu nos ta aki nos a eksperensia ku el a bira un bario masha dushi i hopi artístiko”, Kora Juliana na palabra.

Promé di a sinta un ratu den e Eatery, Kora a kana ku nos pa sera konosí ku e bario. Loke a resaltá ta e limpiesa, e bunitesa, e amabilidat di e hendenan ku nos a topa riba nos kaminda.  Dos artista yu di Kòrsou ku nos a topa riba nos kaminda tabata Junior Tecla i tambe Francis Sling. Tur dos tin nan atalier/shop. Tambe Junius Isenia ta biba i traha den Skalo. Meskos ku nos a topa ku Nicole, un hóben artista dinámiko i nos lo no por lubidá Jose i Ana Freitas di Integra Naturals ku a duna bida tambe den Skalo. Kora a bisa ku riba nan restorant nan tin hóben profeshonal di Kòrsou ta biba. Den e bario mes tin hopi artista lokal, hóben dinámiko i tur ta keda atraé awor aki pa bin den Skalo. I esei ta loke nan ke pa mas hende na Kòrsou mira kiko ta pasando ku e desaroyonan den Skalo.

 

Edifisio di 1928…

Kora ku Angela a bin ku e idea pa un Eatery. Nan kier a bai sentro di siudat pasobra nan tur dos gusta edifisionan históriko. Por ehèmpel kaminda nan ta establesé ta un edifisio di 1928 i tabata  e promé kompleho di apartamentu na Kòrsou i ainda ariba tin algun apartamentu. I esei a pone ku nan a kana buska i huntu ku Marcel di Kuido di Monumento, nan a sa di e edifisio aki. E tabata un rísiko pasobra no tabatin hopi desaroyo ainda. Ta un restorant so tabatin e tempu ei, pero Kora i Angela ta kere den sentro di siudat i p’esei na a establesé einan.

 

Desayuno i almuerso…

Kora a ripara ku nan tin hopi hende ta bishitanan pa Lunch ounke nan ta habri for di 8 or di mainta pa desayuno. Hopi hende ta kere ku ta almuerso so nan ta sirbi, pero nan ta ofresé un desayuno ku produktonan fresku i natural. Tur loke nan ta hasi einan, nan ta purba trese e toke di Kòrsou i fresku. P’esei nan ta yam’e Farm Fresh i p’esei nan ta diferente di otro restorantnan.

 

Keiru konosé Skalo…

Banda di e restorant aki, Kora tambe ta duna Tour na gruponan riba e historia di Skalo. El a konta Djasabra ku e edifisio ku nan ta aden ta parti di Skalo. E diferensia di Skalo i Fleur de Marie por mira na e edifisionan grandi na un banda i e kasnan chikí na otro banda. Kora a konta nos ku e kasnan grandi ta traha pa e komersiantenan riku i esei ta forma Skalo i pega ku Skalo tin Fleur de Marie ku a keda establesé tempu ku Shell a habri. Hopi hende di islanan den bisindario a bin Kòrsou bin traha i nan mester a biba un kaminda sentral pa yega nan trabou fásil i asina Fleur de Marie a nase. Ora bo ta para den Barjestraat ta masha interesante pa mira e diferensia ei, na man drechi tin Skalo i e kasnan grandi i na man robes e kasnan chikí i esei ta Fleur de Marie kaminda e hendenan mas humilde tabata biba. E leuk ta segun Kora ku tur e hanchinan ei tin nòmber di hende muhé. E damanan tabata traha den e kasnan di Skalo, laba paña  i kushina i e hende muhé semper a hunga un ròl importante den Fleur de Marie i ainda e nòmbernan di e kayanan ei ta di hende muhé.

Kora ta duna Tour na turista pero tambe na yunan di Kòrsou. El a bisa ku kada pasa djasabra tin e artista Avantia Damberg ta hasi e Tour i tur hende por partisipá na esaki. E tour ta dura un ora pa un ora i mei i na final por sinta desayuná den Fleur de Marie Eatery shop.

 

Artistanan lokal den Skalo…..

Ainda tin voral hendenan grandi ta biba den Fleur de Marie. Tin sr. Diels den e bario i diferente mas. Pero meskos ku kualke bario tin hende nobo ta drenta i sali. E tendensia awor ta ku hopi artista lokal hóben a establesé nan mes. Por ehèmpel Francis Sling ku ta pinta e muralnan grandi, Junior Tecla, Tatiana Felix ku ta traha instrumèntnan lokal, Junius Isenia ku ta diseñadó lokal i músiko i asina tin diferente hende mas ku ta biniendo tiki tiki eibanda pa establesé nan mes. I mayoria ora nan tei pa habri nan kas/atalier pa bishitantenan. No tin niun bòrchi pafó di nan kas bisando atalier, pero si pasa i mira kas blou i stul ku flor pafó, esei ta di Francis.

 

Abitantenan ta envolví…..

I tur loke nan ta hasi den Skalo ta envolví e abitantenan. Kora a bisa ku ora nan a yega den e bario i habri nan establesimentu einan, nan a kana i sera konosí ku abitantenan den e bario i asina haña sa kiko ta biba den e bario, nan tin bon kontakto ku un señora ku ta representá e bario sra. Hurtado i tambe nan tin Ana Freitas ku Integrá Natural i hopi bia e ta hasi aktividatnan den parke Leyba ku tambe ta un parti importante di e bario di Skalo. Tambe nan tin kontakto estrecho ku kuido di monumentonan ku a renová mayoria di e kasnan.

 

Skalo ta safe i sigur….

Skalo tabatin un stèmpel negativo i tur bario tin esaki. Kora Juliana a bisa Djasabra ku nan tin un aña den e bario i nan a sinta pinta kosnan den e restorant te anochi lat i nunka a sosodé algu negativo,. Nan ta sinti nan safe i klientenan ta sinti nan mes trankil. Ora tin aktividatnan priva anochi den e restorant, nan tin un bewaker di e bario mes i nunka niun insidente fèrfelu a sosodé. Anochi e bario tin un ambiente masha dushi, komo e kasnan no tin balkon e abitantenan ta pone nan stulnan riba asera kaminda nan ta sinta i kombersá.

 

Mas negoshi den Skalo…

Pa aki sinku aña Kora a bisa ku su speransa ta ku mas empresario lokal lo establesé einan pa e bira meskos ku Pietermaai a desaroyá i bira un ambiente riba su mes. I e bunita ta ku nan ta hendenan lokal, tur hende einan ta di Kòrsou ku ta kere den sentro di siudat i ta traha duru pa lant’e. Ta spera ku aki 5 aña lo mira mas establesimentu, mas arte, mas bida ku por ta hopi orguyoso ku a pone esaki riba pia pa nos isla.

 

 

LAGA UN KOMENTARIO

Please enter your comment!
Please enter your name here