Arte ku Propósito: Kuido, edukashon i kreatividat

Tyrzo Martha i Omar Martha ta konta di kolaborashon IBB i Amarte Fonds; Dream Fusions; espasio, bos i oportunidat na talentonan lokal

Instituto Buena Bista (IBB) ta un instituto di arte na Kòrsou, di kual tur aña e programa di Djasabra ta entrevistá, pa sigui mustra e trabou atmirabel ku nan ta hasi den nos komunidat. E programa di awe ta pone lus riba e proyekto Fusions i Amarte Fonds, dos inisiativa ku ta duna espasio, bos i oportunidat na talentonan lokal pa por krese i eksperensiá arte na un nivel mas haltu.

A sintá papia ku Tyrzo Martha i Omar Martha di Instituto Buena Bista, dos forsa kreativo ku ta hunga un ròl sentral den e desaroyo di e proyektonan aki. Públikamente, Valesca a yama nan “danki” pa e trabou profundo i humano ku nan a hasi ku Errin, su yu hòmber.

Resientemente, Errin tabata den e programa i a konta kon su biahe na Ulanda ta, komo un hóben outista, i kon e fundeshi ku el a haña na Instituto Buena Bista a sirbi komo un anker den su bida. E historia di Errin no ta solamente un testimonio di resilensia, pero tambe un reflekshon di kon arte, guia i komunidat por habri porta, krea konfiansa, i duna perspektiva nobo pa hóbennan di Kòrsou ku ta buska nan lugá den e mundu.

Dream Fusions
Tyrzo ta konta ku Dream Fusions ta un kolaborashon entre Instituto Buena Vista i Amarte Fonds di Ulanda. E organisashon ta pone fondo disponibel pa IBB por hasi un open call.. Den e mundu di arte, un open call ta un invitashon na artistanan pa entrega ideanan i proyektonan ku nan tin gana di desaroyá den e konsepto di e yamada.

Dream Fusions a nase komo un konsepto pa krea un puente entre kreativonan visual i institutonan, sea den e área di kuido òf edukashon, pa huntu nan por forma un proyekto artístiko ku ta trese e dos mundunan ei mas serka di otro. E artista i e instituto mes tin e libertat pa skohe, pero pa IBB loke ta mas importante ta ku e proyekto tin un impakto real i duradero. No ta solamente pa krea algu bunita pa wak, sino pa agregá balor na e instituto, na e personanan ku ta parti di e proyekto, i na e kreatividat di e artistanan mes.

Orígen di e proyekto Dream Fusions
Omar ta sigui splika ku pa IBB, for di e promé instante, e kos mas importante semper tabata pa desaroyá kolaborashon. Manera nos tur sa, na Kòrsou kolaborá ta masha difísil. Un banda bo por komprondé paso nos ta un isla chikí, kaminda deskonfiansa por surgi lihé. Hopi bia hende ta duda si kolaborashon ta trese balor pa nan mes, òf si e ta benefisiá e otro banda mas tantu. Pa e motibu aki, e promé punto di partida ta pa siña hende kon pa traha huntu, i kon pa desaroyá sistemanan pa kolaborá di un manera efektivo i duradero.

Na di dos lugá, e focus riba edukashon òf institutonan ku tin di aber ku kuido a bin natural. Nos ta mira ku hopi bia na momentonan di preshon, e promé grupo ku un komunidat ta baha gastu riba dje ta kuido i edukashon. I sin embargo, esaki ta e dos pilarnan di mas importante pa un pais su futuro. Kuido ta nifiká ku bo ta kuida bo hendenan na tur nivel: for di salú físiko te ku bienestar mental i funshonamentu sosial. Edukashon ta nifiká desaroyo. No solamente pa haña un diploma, un trabou òf un título, sino pa bo haña bo mes, bo identidat, i pa bo por kompartí e desaroyo ei ku otro, asina bo ta keda aportá na e komunidat kompletu.

A base di esaki, e idea a nase pa trese e dos elementonan aki huntu: kolaborashon i konosementu. Un espasio kaminda kuido i edukashon no ta kore banda di otro, sino ta mará den un mesun bachi kreativo. Asina bo ta duna mas espasio pa identidat i pa kresementu, spesialmente den e mundu di arte.

Omar ta duna un ehèmpel ku Ulanda tin un sistema di fondonan kaminda diferente fondo ta supsidiá artista, edukashon i kuido. Na Kòrsou, e struktura ei ta mas limitá. P’esei, segun IBB, e úniko manera pa krea esaki ta dor di nos mes, dor di kolaborashon i dor di hasi invershon huntu. Dor di traha huntu, institutonan, artistanan i komunidat por kontribuí na desaroyo di e identidat ku nos ta konsiderá esensial pa nos futuro. P’esei pa IBB, stimulá kolaborashon i desaroyo no ta solamente un meta, sino un mishon.

E realidat ta ku, kon ku bo bira òf kon ku bo buta e, arte ta hopi serka di e dos aspektonan: kuido i edukashon. E bunitesa di arte ta ku e ta hasi uso di imaginashon, i presis e imaginashon ei ta e yuda pa desaroyá identidat. Omar ta menshoná ku tur bia ku e ta splika su studiantenan “kiko ta imaginashon,” e ta usa e historia ku awe nos tin Rover ta kore riba Mars, pero un dia algun hende a hasi e promé pregunta: “kon e planeta ei ta?” E fantasia ei a kuminsá planta simia di ideanan, i for di einan e mundu a kuminsá pensa kon pa yega mas leu. Hendenan ku ta kompartí e ideanan aki, hopi bia ta sientífikonan, eskritornan, i kreadornan, ku a bin huntu pa desaroyá e posibilidatnan.

20 aña di aniversario pa IBB
Omar i Tyrzo ta pone énfasis riba e echo ku tin diferente prueba ku ta mustra ku IBB a bin ta krea un impakto real aki na Kòrsou. Un di esnan ta e muestra di e fondonan ku awor ta disponibel pa kreadornan dor di IBB. Na e promé momentu ora IBB a kuminsá, no tabata tin fondonan. Pero despues di e fundashon, nan kuminsá risibí finansiamentu. Fondonan a bin, i di un ora pa otro a krea posibilidat pa hasi aplikashon, algu ku ántes tabata kasi imposibel. E grèns a baha, i e bùs di oportunidat a habri.

Un otro impakto grandi ta ku hopi hende ta balotá e entrada na akademianan di arte na Ulanda. Antes, esaki tabata kasi inalkansabel pa talento lokal. Pero awe, despues di 20 aña di IBB, e akademianan a kuminsá rekonosé kiko Kòrsou tin, i kiko nos hóbennan tin pa ofresé. Pa IBB, e mishon ta pa yuda studiantenan yega, logra nan soñonan, spesialmente ora e sistema edukashonal hopi bia ta bisa ku “te aki bo por yega.” IBB ta empuhá kontra e límite ei, i ta lucha pa e hóbennan por mira mas leu, pero nan mester tin e gana i e ambishon pa bai tras di nan meta.

Antes, hopi hende tabata kuestioná si nos hóbennan tabata dominá e Ulandes sufisiente. E Ulandes no tabata nan lenguahe di mas fuerte, pero nan tabata ekselente den Ingles. I di e manera aki otro porta a habri, nan a kuminsá drenta akademianan internashonal i a bai hopi bon. P’esei, IBB ta para firme riba un prinsipio simpel pero poderoso: bo mester buska e trayektoria ku ta yega mas serka di e hóbennan, pa nan por sigui, krea, i desaroyá nan futuro ku konfiansa.

Partisipantenan pa Dream Fusions
Omar i Tyrzo ta bisa ku no tin un restrikshon spesífiko pa ken por partisipá, pero si un hende ke partisipá, nan proyekto mester fit den e konsepto di e open call, pero semper por manda e proyekto òf puntra pa yudansa. Tur proyekto ta keda evaluá dor di un grupo di hurado ku lo selekshoná e 4 partisipantenan ku ta mas fuerte. E hurado ta konsistí di representante lokal di Kòrsou i di Amarte. Ora publiká invitashon, i un persona kere ku nan por hasi e yamada, esaki lo ta posibel. Por ehèmpel, un instituto di kuido ku ke implementá algu, nan por buska un kolaboradó pa traha huntu i manda e proyekto aden.

Ta fundamental pa e hendenan komprondé ku IBB tei pa guia tur paso di e proseso. Si bo tin un idea, e instituto ta disponibel pa aportá, duna fasilitashon i konsehonan pa hasi e idea òf e proyekto posibel. IBB no ta solamente un “plataforma”, pero un institushon ku ta traha pa stimulá kreatividat, kolaborashon i desaroyo di talento visual na Kòrsou.

Proyekto visual
Tyrzo ta splika ku e kategoria visual por ta den diferente forma: pintura, kuadro, òf presentashon, pero e punto prinsipal ta pa duna espasio pa hende mira i komprondé e aspektonan di e mundu visual. Si bo wak Kòrsou, nos tin hopi aspekto visual ku ta reflekshoná nos kultura i nos país, ku ta inspirá, i krea diferente interpretashon.

E idea ta pa stimulá e artistanan pa eksplorá kiko e visual por representá. Por ehèmpel, un outo nèchi hende ta interpretá komo un elemento visual pa hala atenshon. Si bo ta hasi kabei tur siman ta pa hende mira. E proyekto por mustra e ritmo di nos bida diario. Bo ta drenta den e espasio, opservá i kompartí tur loke bo ta mira.

Tyrzo enfatisá ku e ophetivo no ta solamente pa krea arte bunita, sino pa stimulá komprenshon i emoshon. Si un hospital, skol òf komunidat ta involukrá, nan por trese un mensahe visual ku ta alegre, inklusivo i ku ta inspirá hende pa mira kos den un manera positivo, sin temor i ku ta krea speransa.

Arte ku Propósito: Kuido, edukashon i kreatividat
Omar ta konta ku aña pasá nan a kuminsá ku un idea kompletamente otro for di e idea original pa Kas di Kuido Wardador, den bisindario di Sta. Rosa. E idea original tabata pa traha un mural, pero ora nan a kòmbersá ku e personanan,  e enfoke a kambia totalmente. Na lugá di un mural, nan a deskubrí ku e hendenan tabata tin un nesesidat práktiko: krea relashonnan, hunga weganan di mesa i organisá aktividat ku ta trese alegria. Un di personanan di e instituto di Kuido Wardador a fayesé, i IBB a organisá e entiero mirando ku e persona no tabata tin famia na Kòrsou.

Tyrzo enfatisá ku e punto prinsipal di e proyekto ta pa krea konekshon ku e hendenan. Un otro ehèmpel ta un proyekto na Bèlgika, kaminda hendenan mester a muda for di un edifisio bieu pa un nobo. E intenshon tabata pa trese mas kontakto i komunikashon entre e hendenan, sin un plan formal. Nan a deskubrí ku e hendenan tabatin e nesesidat di transportashon, kortina, yudansa pa yena formulario, i hopi mama soltero ku tin mester di apoyo.

Riba tur e kosnan ku nan tabata tin mester, Tyrzo a usa esaki komo un entrada. E hendenan a bin kuminsá puntra: “bo ta un artista, kiko esaki tin di aber ku arte?” Einan Tyrzo a mustra nan ku arte no ta solamente estétiko; e ta un medio di komunikashon, tradusí nesesidatnan práktiko pa solushon, i posishoná bo mes den komunidat. E aspekto di komunikashon  abo ta skohe kon pa tradusí e pa yuda bo bai dilanti. Ku enfoke ei, a yega na traha un eskultura a base di e hendenan su nesesidat i loke na tin gana di dje.

Fondo i Guia pa Kreatividat
Omar ta splika ku kada proyekto den Dream Fusions por risibí un budget pa traha kuné. Parti di e budget ta destiná komo salario pa e artista, mientras ku e otro parti ta pa ehekushon di e proyekto. Den kaso di un kolaborashon, e artista i e instituto mester koordiná kon nan ta parti e responsabilidat.

Durante e 6 lunanan despues ku anunsiá e partisipantenan, mester kuminsá ku e ehekushon di proyekto, ku posibilidat pa trese kambio i balor agregá. Ora e proyekto ta kla, lo bai tin un presentashon di e resultado, kaminda kada partisipante mester splika kon nan a traha i kon nan a plania pa kontinuá e proyekto.

Aña pasá e proyekto tabata Back to Your Roots, kaminda Shardeny Felicia i Ralph Winedt tabata eligí pa hasi un proyekto ku dos skol riba nan futuro. Nan a presentá nan resultado, i na e momentu aki Ralph ta traha riba un pelíkula ku e ta planiá pa presentá den Bario pa tur hende por wak i, den futuro, pa festivalnan.

IBB su ròl den e proseso ta pa fondo i guia.

Amarte Fonds: Impakto riba arte i komunidat
Amarte Fonds ta focus riba arte, pero nan meta ta diferente: nan ta duna posibilidat pa artistanan ku normalmente den fondonan mas grandi no lo risibí un chèns. Por ehèmpel, bo por ta un artista ku a kaba di kuminsá òf bo tipo di arte no ta korelá kompletamente ku e deskripshon di fondonan grandi. Nan ta duna un fondo mas chikitu, pero bo tin hopi mas chèns pa bo risibí e apoyo.

Pa IBB, e proyektonan ku Amarte Fonds ta yuda duna ta importante, paso nan meta no ta solamente krea impakto di un ratu riba komunidat, pero un impakto duradero. IBB ta komprondé ku pa desaroyá nos mes i nos komunidat, nos mester kreá kondishonnan ku ta duna posibilidat pa durabilidat.

Na Ulanda tin fondonan, pero e mayoria ta basá riba un persepshon Ulandes, ku no semper ta reflehá e realidat di Kòrsou. Tur e trabou ku IBB ta hasi ta pa krea e konekshon, i pa pone e basenan pa un impakto duradero. IBB ta yama un danki spesial na Amarte Fonds pa e oportunidat ku nan a duna IBB pa definí nan proyektonan, un fondo ku sigur ta yuda nos hendenan na Kòrsou.

Un palabra ku ta popular hopi den e mundu di fondo ta “impakto.” Na Kòrsou, hopi kos ta kuminsá for di 0, kual ta pone ku kada impakto ta relevante. Pero loke IBB ke hasi ta krea kondishonnan, ku nivel, i konsientisashon di kon leu bo por bai ku e impakto. Un mentalidat, e konsenshi kon pa dil ku nos mes kosnan, i kon pa realisá ku ora nos ta hasi e algu e mester tin un impakto riba bo komunidat, ku ta duna bo produkto mas kalidat i pa nos ta konsiente di e kalidat.

Inskribí pa Dream Fusions i IBB
Omar I Tyrzo ta invitá artistanan òf institutonan ku ta interesá den Dream Fusions pa inskribí via di e website di IBB: ibb.cw/fusions, òf por tuma kontakto via di Instagram i Facebook. Además, por manda un email na outreach@ibb.cw. I si bo ta preferá kontakto mas personal, bo por manda un app na 515-3605 òf bishitá e lokashon personal entre 10:00 i 18:00.

Tambe por inskribí pa e siguiente aña eskolar di IBB. Tur aña, studiantenan nobo mester traha un tarea kreativo; e meta no ta pa stòp bo di partisipá, pero pa IBB tin un bista di unda bo nivel ta i kiko bo tin gana di traha riba dje. Tur hende for di  16 aña bai ariba ta bon biní pa inskribí.

Ta bunita pa remarká ku IBB a risibí un donashon di famia Monsanto, ku ta inkluí e kolekshon di Toni Monsanto ku a fayesé na 2014. E kolekshon ta unu grandi di 260 pintura i mas o ménos di 400 obra di arte ku lo bai keda presentá den un ekshibishon spesial.

IBB ta tei pa yuda sostené kolaborashon i ofresé e komunidat oportunidat pa apresiá e trabou artístiko di nos artistanan lokal.