Arthur Nivillac direktor Optima Arbo Dienst: Un trahadó balorá lo duna no 100 pero 200%

200

Arthur Nivillac Direktor di Optima Arbo Dienst ta klousurá aña ku algun konseho na doño di trabou i trahadónan. Pa loke ta 2022 tabatin hopi desaroyo laboral entre otro e pandemia di covid ku nos a sali mas òf ménos di dje. 2022 pa Optima a bai hopi bon pero pa e klientenan si e tin puntonan preokupante. Nos ta papiando di post covid i te ainda e tin su influensia. Tin hopi hende a sigui ku kehonan prinsipalmente di pulmon. E ta unifiká ku post covid tei pero e trabou ta ferwaktu ku e trahadó tei pa funshoná optimal i tin hopi hende ta disfunshonal debí na e kehonan di post covid, doño di trabou no ta tene kuenta ku e kehonan aki i pa kolmo ta bin aserka ku Kòrsou no ta papia mes di post covid.

Post covid

Konsekuentemente no ta tene kuenta ku post covid. E doño di trabou ku no tin muchu komprendementu úniko kos ku nan ta ripará ku e trahadó ta tuma su tempu pa sali di malu i e ta trese kuné ku nan ta sali for di e trahadó aki. Esei ta un desaroyo segun Nivillac ku no ta positivo. Banda di esei loke ta kresiendo, ta e situashon di depreshon. No tur ora e ta di post covid pero inseguridat komo hopi hende a keda ku problema finansiero, problema relashonal, no a haña trabou ainda. Awor aki nan tin man yen ku problemanan mental sikológiko di kiko ta bai pasa. Esei ta un di e sifranan alarmante. Optima a bisa ku nan ta kasi riba 60% di problemanan mental. E ta manifestá entre otro debí na dolónan na kurpa, e trahadó no ta drumi bon i  ora e trahadó bin serka nan nan ta ripará e inseguridat, ansiedat ku tin. Nivilaac ta kere ku mester enfatisá aki ku no tin e ‘vangnet’. Sabiendo ku tin e malesanan aki mester tin un ‘vangnet’ prosedural kon ta dil ku e hendenan aki. Pa haña un sikólogo awor aki ta dura masha hopi. Un hende ku problema mental mester di un sikólogo awe i no mañan i ku miedu ku e hende por hasi su mes daño i asta su mes daño. Un tempu di espera awor aki pa sikólogo ta entre un pa 2 luna ku ta demasiado. I danki dios Optima Arbo Dienst tin su propio netwerk ku nan ta sigui bringa pa asina por haña e orarionan pa por yuda e kliente. I ta orarionan masha straño nan ta haña manera anochi òf djadumingu. I esei no mester ta asina. E mester ta un prosedura bon deliñá pa asina nan por manda nan hendenan.

Malesanan ta kambiando

Mas aleu loke ta importante ta ku malesanan ta kambiando i bira otro. Tin masha hopi hende ku problema ku situashon na trabou problema di brasa, lomba, pia pulmon ku ta kai bou di kategoria di ‘bedrijfsongeval’ òf ‘beroepsziekte’. Esaki ta nifiká ku e tahadó a bira malu pasobra tin algu den su trabou ku a okashoná e malesa. Esei no tin nada di aber ku covid pero situashonnan laboral no sano ku te awe tin na Kòrsou. Esakinan tin di aber ku hopi material ku mester pa hasi e trabou manera mester ta, no tin, manera un stul optimal, un masker optimal, un kòmpiuter optimal, un protekshon di un resepshonista optimal etc., etc. i si no tene e trahadó sigur riba trabou por ferwaktu ku e ta bira malu. I ora e bira malu ta mand’é kas lubidando ku ta e doño di trabou a hasié malu. Antes e hende ta bai kas bai yora pero awor ta bai Optima Rechst Hulp Arbeid kaminda nan tin nan abogado pa yuda e hende pa su trabou bek òf pa bai korte. I p’esei ta bon pa promé bai kas, bring’é. E ta trese ku e trahadó i e doño di trabou tin di kumpli ku e reglanan di seguridat. Seguridat ta un yu skondí na Kòrsou i no ta pone kasi nada di atenshon riba dje.

Laboral no a bai dilanti den 2022

Den 2022 laboral no a bai dilanti, atenshon pa laboral tampoko, leinan pa labor a keda meskos ta solamente e trahadó a bira mas konsiente i ta buskando nan derechi mas lihé i no ta aseptá sin mas pa bai kas. I esei ta tòg un desaroyo positivo. Ta un lástima segun Arhur Nivillac pasobra nan 10 aña di gritu pa leinan laboral, ban hasi e hende mas konsiente di seguridat i salubridat na trabou, niun hende a mishi kuné, Leinan a keda mesun bieu tei ainda.

Nos lo kuminsá kore i mira si gobièrnu ta bin nos tras

Ta tristu segun Nivillac ku tantu e ta papia i te ainda niun hende a yam’é i puntr’é dikon e ta papia e kosnan ei, kiko por hasi. I p’esei e ta bolbe ripití e mesun kos pasobra nan no ta para ketu pasobra nan tin nan plannan pa 2023. Si sinta warda gobièrnu bo no ta bin kla tur ora ta mihó bo kuri numa i mira ku gobièrnu ta kuri nan trabou. E ke pa hende djis tene kuenta ku tur kos ta kai i lanta ku labor. Si labor ta bon, e ta bon pa e turista tambe. E trahadó ta bai traha kontentu si e ta traha den un ambiente sano. I no mester lubidá ku maltrato laboral ta keda krese na Kòrsou en partikular awor ku tin ménos hende ta traha. I esun ku no gusta, ata e porta ei. Intimidashon seksual,  tentamentu ta kresiendo, pero nos leinan no ta akapará esakinan. ‘Burnout’ tambe ta subiendo drástikamente i pa kolmo e doño di trabou no ta tene kuenta ku esei i asta ta kere ku e ta manera un grip di tres dia. Burnout ta 4 pa 5 luna bo ta for di trabou.

Optima Arbo Dienst lo no para ketu den 2023

Pa loke ta 2023 Optima Arbo Dienst lo no keda para ketu. Nan ta drùk besig pa e lei di trabou. E konsepto ta kla i ta spera di por present’é den 2023 lo present’é den parlamento i ta spera ku parlamento lo bras’é i wak si lo pas’é mas lihé posibel. E no ta kere ni spera ku Kòrsou ku tin tur e profeshonalnan ku ta konsehá otro islanan i e otro islanan ta pasa bai laga Kòrsou ku Kòrsou su konosementu. Kòrsou mes no ta mir’é pero e otro islanan si ta mir’é.

Tambe lo bai traha na ora e persona ku ta bira malu i ta keda mandá kas, lo mester purba usa e persona ei den su mes organisashon i tene vital. I lo bai ‘boost’. Seguridat ta esun ku ta bin mas haltu. Nan tin dos kurso ku nan ta dunando rònt Antias ku ta seguridat i intimidashon seksual. Ta spera ku na 2023 lo kuminsá konsientisá nos bokanan di trabou kon ta dil ku otro, respetá otro i no ta pasobra ta muhé bo tin derechi di papia òf mishi pasobra tur esei ta hasi trabou no sano. Tambe lo bai konsientisá nan produktonan mas fuerte. Nivillac ta kere ku tin instansia ainda ku no sa kiko ta un Arbodienst, ku no sa kiko ta seguridat i nada. I e instansianan ei ta hotèl, pakus, bar i restorant, Ta sektornan grandi i por a tuma nota ku ta netamente e sektornan ei ta esnan ku mas ta bati na porta di Optima. E sektornan ei tin hopi problema di ‘Beroeps ziekte’ den trabou.

Aña interesante

2023 lo bira un aña interesante. Mester tene e hende sano den su boka di trabou, motivá i asina e o produsí no 100 pero 200%. I esei mester realisá. Optima su konseho na Kòrsou ta ku ora inbertí den e trahadó no ta plaka pèrdí pero ta mas di loke a invertí den dje. Un trahadó ku ta sinti ku e ta balorá e lo duna mas di loke e doño di trabou ta pidi.

 

LAGA UN KOMENTARIO

Please enter your comment!
Please enter your name here