ORANJESTAD.- Polis di Aruba ta informá ku djaluna pa mas o ménos 6:14 di mainta sentral di polis a haña notifikashon ku na kosta di Bachelor Beach pariba di Anker lo a haña un kurpa sin bida. Sentral di polis ta despachá patruya di San Nicolas na e sitio di e suseso i demas outoridatnan.
Na yegada di e patruya bèrdat ta bin topa ku un kurpa sin bida band’i kosta i den un estado avansá di deskomposishon. Ta trata di un hende hòmber i su identidat no ta konosí. Na e sitio a presentá departamento forénsiko, dòkter forénsiko, departamento di reshèrshe, UMM (Unit Mensenhandel Mensensmokkel) i departamentu di slachtofferhulp.
E kaso ta bou di investigashon. Brantwer tambe a presentá pa asina duna polis un man. Kuerpo Polisial Aruba ta pidi pa esun ku sa algu òf a wak algu pa yama e tiplijn di polis cu ta 11141. Bo ta keda anónimo.
