ORANJESTAD.- Polis di Aruba ta informá ku a bolbe registrá otro kaso di morto den tráfiko. Ta asina ku djadumingu último, pa mas o ménos 4:30 atardi sentral di polis a haña notifikashon di un aksidente ku a tuma lugá na Seroe Blanco. E promé informe a indiká ku un señora tabata manehá un outo Ford Fusion koló blanku i el a dal den un pilá di kurá di kas. E señora a haña basta sla.
Mesora a manda patruya polisial i tambe ambulans na e sitio. Na yegada di e patruya di polis nan a bin topa ku e señora den e outo. Ambulans tambe a presentá i a stabilisá e víktima pa despues transport’é pa hospital pa e haña asistensia médiko avansá.
Polis di tráfiko a presentá a bai hasi investigashon na e sitio.
Djaluna mainta polis di tráfiko a keda informá pa personal di hospital ku lamentablemente e señora a fayesé. Dòkter na hospital ta konstatá morto di e señora Olga Denise Lampe nase na Aruba 10 aprel 1942 (84 aña). Kuerpo Polisial Aruba ta manda palabra di kondolensia na famia di e defuntu.
