ORANJESTAD.-Polis di Aruba ta informa ku den e mardugá di djasabra anochi pa djadumingu, mas o ménos 02:25 sentral di polis a haña notifikashon di un aksidente di tráfiko den kua vehíkulonan a dal frontal na altura dia All To Car na Ponton.

Na yegada di e promé patruya a bin topa un outo di famia Suzuki Baleno blanku ku a dal kontra di un pikòp Toyota Tacoma shinishi. E shofùr di e Suzuki tabata mustra hopi grave i a pidi asistensia di ambulans. Tambe tabatin mester di rescue car di brantwer mirando ku e shofùr di e suzuki a keda pegá den e outo. Ambulans a yega na e sitio pero lamentablemente no por a hasi nada mas pa e shofùr.

Dr. Texier a konstatá morto di Domingo Encarnacion Heredia  pa 02:40. E ta nase 20 yanüari 1977 na Republica Dominicana. E shofùr di e Toyota a keda transportá pa hospital i su situashon ta stabil.

Apénas mainta a habri i mas o ménos 06:55 sentral di polis a haña notifikashon ku tin un persona benta abou ku sla na kurpa na altura di Linear Park banda di Aruba Surfside Marine. A manda polis na e sitio i tambe ambulans. E patruya a konstatá ku un señora tabata benta abou na suela i su situashon ta grave. E promé informashon ta indiká ku un vehíkulo a alkansá e señora i e shofùr a sigui kore bai lagando e señora gravemente herida. Esaki ta un echo kastigabel pa lei!

Ambulans ku a yega na e sitio a trata e señora i despues transporte ku gran urgensia pa hospital. Sin embargo na yegada na hospital e señora a fayesé. Pa 07:49 dòkter a konstatá morto di Ana Rosa Montaño Martinez nase 16-02-1962 (60 aña) na Republica Dominicana.

Polisnan di tráfiko ta hasiendo investigashon.

LAGA UN KOMENTARIO

Please enter your comment!
Please enter your name here