ORANJESTAD.-Polis di Aruba den un informe ofisial ta informá di un aksidente hopi serio ku a tuma lugá djadumingu anochi pa mas o ménos 11:58 pm, riba L.G. Smith Blvd na altura di Wind Creek Casino. Un outo a dal dos peaton i kore bai.
Sentral di polis a haña e notifikashon di e aksidente i a manda patruya na e sitio pa duna asistensia. E promé informashon ta indiká ku ta un outo SUV kolo pretu a alkansá e dos personanan pa despues sigui kore bai.
Banda di polis, ambulans tambe a yega na e sitio pero lamentablemente no por a hasi nada mas pa nan. A pidi asistensia di slachtofferhulp pa atendé ku e famia di e víktimanan, miéntras ku polis a kuminsá ku búskeda di e outo enkuestion. Na un adrès na Bushiri a topa ku e outo i a detené e shofùr femenino.
Entretantu na e sitio di e aksidente dòkter Voskuil a konstatá morto di e pareha:
Josely Paulina Vasquez Gonzalez, nase 09-07-1960 na Repúblika Dominikana i Carlos David Vialez Valerio nase 19-10-1971 na Repúblika Dominikana. Forsa na famia di e defuntunan.
