WILLEMSTAD – Minister di Desaroyo Ekonómiko Giselle Mc William a informá ofisialmente ayera ku Aruba Airlines awor lo ehekutá buelonan direkto entre Kòrsou i Miami danki na esfuersonan hasí pa CTB i su persona. Esaki sigur ta un notisia hopi alentador mirando e tarifanan astronómiko ku American Airlines tabata kobra riba e ruta aki. Asta último lunanan a redusí e kantidat di buelo diario na solamente un pa dia. Di e forma ki ta logra dos meta, krea kompetensia riba e ruta ku sigur ta na fabor di e biahero i tambe haña mas stul riba e ruta importante entre Kòrsou i Miami. “Pabien na Aruba Airlines i tambe na pueblo di Kòrsou ku awor a ekspandé e kantidat di stul pa trese turista nos isla via di e ruta aki, i mas ku klaro pa nos mes por hasi uso di dje pa biaha pa Merka,” tabata palabranan di Minister Mc William. Riba e sitio di internèt di e kompania aéreo Aruba Airlines ta indiká ku e buelonan lo ta riba djaluna, djárason, djabièrnè i djadumingu. No ta konosi ki dia e buelonan lo inisia i e orarionan. Ta stipulá e preis na 434.00 doler.
Komunikado ofisial di Gobièrnu:
Aruba Airlines ku buelo direkto 4 biaha pa siman entre Kòrsou i Miami
Logro importante di CTB, CAP i Minister Giselle Mc William
WILLEMSTAD – 31 di òktober 2019 – Aruba Airlines lo inisiá ku buelo direkto entre Kòrsou i Miami kuminsando for di 27 di novèmber 2019, ku un frekuensia di 4 buelo pa siman. E buelonan aki ta nifiká mas stul riba e ruta Miami – Kòrsou i ta brinda oportunidat na mas bishitante for di eksterior pa por bini i konosé nos dushi isla. E logro aki ta danki na un kolaborashon entre Minister di Desaroyo Ekonómiko, Giselle Mc William, Ofisina di Turismo di Kòrsou (CTB) i Curaçao Airport Partners (CAP) ku a hasi esaki posibel. Despues di a firma e akuerdo di manera ofisial, Sra. Mc William ku gran emoshon a indiká ku “Trabou duru ta paga, i awe ku gran satisfakshon nos por disfrutá di e frutanan di esaki.”
Despues ku Minister Mc William a reuní ku e aerolínea algun siman pasá na Aruba, a pone e promé stap pa por a logra e buelonan aki. E buelo direkto di Aruba Airlines manera indiká lo ta 4 biaha pa siman i lo tuma luga riba Djadumingu, Djaluna, Djarason i Djabièrnè ku orario di salida pa 8:30 di mainta ku yegada na Miami pa 11:30 di mainta. E buelonan aki lo keda ehekutá ku un avion tipo Airbus-320 ku tin un kapasidat di en total 180 stul. E biahero lokal por biaha dirèkt pa Miami na un orario tempran di mainta di manera ku unabes e yega Miami e por disfrutá ainda di gran parti di e dia. Pa e biahero ku ta biaha pa negoshi tambe esaki tin su bentaha grandi mirando ku e persona lo por plania mas aktividat i reunionnan pa riba e dia ei mes.
Pues, e skema di buelo aki ta duna amplio posibilidat pa por biaha entre Kòrsou i Miami i lo duna oportunidat na e turista Merikano pa por bishitá Kòrsou di un manera fásil i na un preis atraktivo. Tambe lo por spera tarifanan benefisioso pa e biahero lokal ku ta deseá pa hasi uso di e konekshon aki pa biaha pa Merka sea pa plaser òf negoshi. Tur esaki lo generá mas tráfiko den oranan di mainta pa nos aeropuerto lokal i konsekuentemente mas aktividat ekonómiko einan.
Minister Giselle Mc William ta felisitá Ofisina di Turismo di Kòrsou (CTB) i Curaçao Airport Partners (CAP) pa nan aporte pa ku realisashon di e proyekto pa a logra e buelonan aki entre Kòrsou – Miami ehekutá pa Aruba Airlines. Un desaroyo ku sigur lo tin su efektonan positivo den nos ramo turístiko i tambe en general pa ku nos ekonomia. Otro logro importante pa duna aliento i inspirá nos komunidat.
