ORANJESTAD.- Un kaso ku a sakudí Aruba awe mainta ta e atrako armá ku a tuma lugá riba e empresa Gems Jewelry na Palm Beach. Polis di Aruba ta informá ku e notifikashon a yega na sentral di polis pa 11:10 di mainta, den kua a informá outoridatnan ku un atrako a kaba di tuma lugá riba e joyeria menshoná.
E promé informashon registrá ta indiká ku lo ta dos hende hòmber lo a atraká Gems Jewerly. Un di e hòmbernan tabatin arma di kandela den su poder. E informashon risibí ta bisa mas aleu ku e hòmbernan no a papia ni un palabra. Nan a keda ku hèlmu bistí. Nan a hui despues direkshon pariba riba un skuter kolo pretu.
A despachá polis uniformá i otro departamentonan manera k-9, RRT, polis motorisá, Atrako Team i tambe polis tékniko pa asina sigui ku e investigashon. Kuerpo Polisial di Aruba ta hasi un apelashon na personanan ku sa algu òf a wak algu pa nan yama e tiplijn di polis ku ta 11141. Bo ta keda anónimo.
