ORANJESTAD.-Den oranan di mardugá tras di lomba, nèt despues di 12’or di anochi, sentral di polis a haña notifikashon di un aksidente ku a tuma lugá riba e kaminda di Westpunt, ku tin un motersaikel embolbí, asina bosero di polis di Aruba ta informá.
E informashon inisial ku a yega polis ta ku e shofùr di e motersaikel, di un manera ora otro a bai dal den barankanan kantu di kaminda i no ta reakshoná mas. Sentral di polis a dirigí patruya di polis i ambulans pa e sitio. Na yegada di e promé patruya a topa ku e shofùr di e motersaikel i enbèrdat e no tabata reakshoná mas.
Personal di ambulans a duna asistensia médiko na e hende hòmber shofùr, pero lamentablemente no por a hasi nada mas pe. Dr. Forensico a konstatá morto di e mucha hòmber Noah Ian Hietbrink nase na Aruba dia 10 novèmber 2008 (17 aña).
Spesialistanan di tráfiko a presentá huntu ku polis tékniko pa hasi investigashon nesesario. Departamento di slachtofferhulp tambe a presentá pa asina brinda sosten na famia di e defuntu.
Kuerpo Polisial di Aruba ta manda palabranan di kondolensia na famia di e defuntu. Tambe ta hasi un yamada na hinter komunidat pa komportá mas trankilo den tráfiko!
 ta bira e 11 morto den tráfiko){kind=link}