Crisis Team COVID-19 a disidí ayera ku:

 WILLEMSTAD.- Entrante awe tur pasahero for di Kòrsou mester tèst pa COVID-19 ora yega Aruba. Asina Crisis Team COVID-19 di Aruba a informá ayera. E Crisis Team a bisa: ‘Mirando e desaroyonan di COVID-19 na nos hermana isla Kòrsou gobièrnu di Aruba a disidí pa suspendé e eksonerashon di tèst pa biaheronan prosedente for di Kòrsou entrante djasabra 21 novèmber 2020.’

For di algun siman kaba, biaheronan prosedente for di Kòrsou no mester a tèst na Aruba, mirando ku e situashon di riesgo entre e dos islanan tabata similar, i pa fasilitá biahamentu entre e dos islanan.

Segun e deklarashon di e Crisis Team: ‘Sinembargo, e situashon di kontagio na Kòrsou a konosé un oumento, tresiendo komo konsekuensia ku no ta keda otro opshon pa deskontinuá e eksonerashon aki.’

Entrante djasabra 21 di novèmber 2020, tur pasahero prosedente for di Kòrsou mester hasi un tèst di COVID-19 promé ku e biahe pa Aruba, òf na yegada na aeropuerto di Aruba, meskos ku ta konta pa pasaheronan ku ta yega for di otro destinashonnan ku Aruba ta habri pa nan.

Pasaheronan for di Kòrsou ku ta biaha den e próksimo tres dianan, ku a registrá na e ‘online ED system’ kaba i no a tèst ainda, lo haña e oportunidat pa hasi e tèst na yegada na aeropuerto di Aruba (riba propio gastu) òf por opta pa bai pa 10 dia den karentena.

Pasaheronan por akudí serka nan aerolínea òf na www.aruba.com pa mas informashon.

Aruba a konosé un bahada hopi drástiko den e último simannan. Den luna di sèptèmber pa algun dia tabatin mas ku 1600 kaso di COVID-19 aktivo na Aruba. Djaweps último riba e isla tabatin ocho kaso nobo di COVID-19 registrá. Den total tabatin 79 kaso aktivo. Djabièrnè último na Kòrsou tabatin 60 kasonan nobo registrá i den total 640 kasonan aktivo.

Remarkabel ta e diferensia entre e kantidat di hende ku tabata kontagiá ku a fayesé entre e dos paisnan. For di mart 2020 na Aruba 45 pashènt di Corona a fayesé, na Kòrsou tres.

 

 

LAGA UN KOMENTARIO

Please enter your comment!
Please enter your name here